BJP paih a, Congress thláwp turin MPCC-in Mizoram mipui an ngen

Mizoram Pradesh Congress Committee (MPCC) hruai­tute chuan nimin khan Aizawl Press Club-ah thuthar theh­darhtute an kâwm a; BJP leh a thawhpuite paih thla a, Congress party thláwp turin Mizoram mipui an ngen.

MPCC thupuangtu Dr Lallianchhunga chuan, BJP sorkar hnuaiah chak takin India ram chu Hindu lal rama din tumna a kal mek niin a sawi a, "Kristiante tan pawha him lo tam tak a awm avangin Mizoram mipuite'n BJP leh a thawhpuite paih thla a, sakhaw zalenna duhtu Congress party hi thláwp turin kan ngen a ni," a ti.

Sakhuana behchhana India khua leh tui nih theihna dan, Citizenship Amendment Act thiam takin an kalpui nia sawiin Lallianchhunga chuan, "MNF sorkar pawhin a lo thláwp tawh. India ram tan dan pakhat (one nation, one law) chauh hman a nih theihna turin Uniform Civil Code (UCC) an buaipui mek," a ti a; June 27, 2023 khan PM Narendra Modi chuan Bhopal-a BJP mi leh sate intawhkhawmnaah UCC hman vat a duh thu a sawi chhuak niin a sawi.

Dr Lallianchhunga chuan, August 25, 2023 khan All India Congress Committee hruaitute leh Central YMA hruaitute chu CYMA pisaah an inkawm thu sawiin, "AICC hruaitute chuan sakhaw tê zawkte tana dan him lo, innêkchêp leh inchîmral tuma inrîkrâpna leh râwvâ taka sakhaw dang vuantute nghaisak hi Congress party chuan a din tirh aṭangin a do tlat tih an sawi," a ti.

MPCC thupuangtu chuan, Congress party-in sorkar laipui leh Mizoramah sorkarna an chan chuan UCC leh Forest (Conservation) Amendment Act, 2023 chu hnam tlêm zawk leh sakhaw dang tan a him loh avangin an ṭhiah dawn thu a sawi bawk.

MPCC THUPUANGTU SAWI DANGTE

■ BJP-in Forest (Conservation) Amendment Act, 2023 kalpui turin hma a la mek.

■ One nation, one election kalpui tumin hma an la a; one nation, one language pawh BJP-in an manifesto-ah an telh.

■ Indian Penal Code chu Bharatiya Nyaya Sanhita, Criminal Procedure Code chu Bharatiya Nagarik Suraksha Sanhita leh Indian Evidence Act chu Bharatiya Sakshya tia thlak tumin Parliament-ah BJP-in an pu lut.

■ BJP hian Criminal Law-te pawh Sanskrit hming puttir vek an tum.

■ September 18, 2023-a Parliament special session-ah 'India' tih hi 'Bharat' tiin an thlak dawn nge tih sawi chian theih a ni lo.

■ Hengte hi dan hmanga Hindu lal ram din tumna a ni.