CM-in nurse inkhawmpui a hmanpui
Trained Nurses' Association of India (TNAI), Mizoram State Branch chuan nimin khan Synod Conference Centre-ah General Conference vawi 19-na an hmang ṭan a, chief minister Zoramthanga'n a hmanpui. An inkhawmpui hnuhnung ber, kum 2019 hnu lama Florence Nightingale Award dawngtu nurse pali an chawimawi.
TNAI General Conference thupui chu 'The Future of Nursing: Leading Change, Advancing Health and Transforming Care' tih a ni. Kum 2019 hnu lama Florence Nightingale Award dawngtu nurse pali - Dengthangpuii (L), health supervisor (rtd), Kulikawn (2020), Vanlalṭhuami, health worker, Theiriat (2020), Vanlalrovi, staff nurse, Thingsulthliah PHC (2021) leh C Zopari, ward superintendent (rtd), Civil Hospital, Aizawl (2023)-te hnenah chawimawina an hlan.
CM Zoramthanga chuan, nurse-te hnathawh chu ropui a tih thu leh ram mipui hriselna lama thâ thawhtu ṭangkai leh pawimawh an nih thu a sawi a; an eizawnna leh hnathawh a nih mai bakah, mihringpuite rawngbawlna a nih avangin, hmangaihna nena damlote enkawl zel tur leh ṭha taka dawngsawng ṭhin turin a chah.
Chief Minister chuan, nurse an nih anga an hna piah lam thil dangah nurse hmingṭha leh chhuanawm tak tak an awm ṭhin chu ropui a tih thu a sawi a; Mizoramin tun hnaia harsatna hrang hrang a tawhte chu ṭan lâk thartirtu ni se a duh thu sawiin, harsatna an tawhte hneh tura theihtawp chhuah turin a fuih.
TNAI Headquarters secretary general Evelyn P Kannan pawhin thu sawiin, Mizorama nurse-te zingah thawhhona ṭha tak a awm chu fakawm a tih thu a sawi a; TNAI chu kum 115-a upa a nih thu leh branch 34, member 5,00,000 leh zirlai member 2,31,303 an neih mek thu a sawi bawk.
Inkhawmpuiah hian TNAI North East Region vice president C Susan Dkhar Tada, Health department joint director (Nursing) Lalchhanhimi leh TNAI Mizoram State president Lalremmawii te pawhin thu an sawi a; Christina Zothanpuii'n thupui a sawi.
Chawhnuah TNAI Mizoram member thite sûnna hun hman a ni a, rorel a ni. Vawiin hian inkhawmpui an chhunzawm dawn a, hruaitu thar an thlan dawn bakah, inzirtirna hun hman a ni ang.
TNAI hi kum 1908-ah din niin, Mizoram State Branch chu August 1964-ah din a ni a; September 1, 2023 thleng khan Mizoramah TNAI life member 3,750 an awm a ni.