KHAWTHLIR

Thisen pe

Hnahlan Joint YMA chuan nimin khan an khaw community hall-ah thisen pek rûnpui an huaihawt a, Champhai District Hospital tan thisen unit 70 an pe.

G-20 SDG zirho

All India Radio, Aizawl leh Pachhunga University College-a Economics department chuan nimin khan 'National symposium on Sustainable Development Goals: G-20 and Mizoram' tih thupui zirhona an buatsaih. AIR, Aizawla thawkte leh PUC Economics department-a zirtirtu leh zirlaite an tel a ni.

Lamka tlawh

Zoram Thar Zofate Lairelna Inpui hruaitute chuan September 5, Thawhlehni khan ITLF hruaitute leh Lamka Joint Artistes-te nen Lamka, Manipur-a Zo hnahthlak, frontline duty-te leh ráltlân awmna relief camp paruk an tlawh a, ei tur leh damdawi an sem. Rev. Dr Zaichhawna Hlawndo hoin an thawk chhuak a, nimin khan martarte hriatrengna Wall of Remembrance tlawhin, an ṭawngṭai rual a ni.

Lehkhabu tlangzarh

Lalhmingmawia Ralte lehkhabu ziah, ‘Pathian mi hriat Lalramzauva Ralte chanchin ngaihnawm’ tih chu nimin khan Art & Culture minister R Lalzirliana'n a pisaah a tlangzarh. Lehkhabu hi Synod Bookroom hrang hrangah Rs 250-in lei theih a ni.

Manipur raltlan

Nimin tlai dar 5 dinhmun angin, Manipur aṭanga sahimna zawnga Mizorama lut mi 12,012 an awm mek. Mizoram sorkar chhinchhiah danin, Manipur raltlante zinga mi 2,548 chu relief camp 34 an awm a, mi dang 9,464 chu hmun dangah an awm thung. September 5 aiin niminah mi 14-in an tam zawk a ni.