CM leh Manipur-a Zo hruaitute an inkâwm

Kuki-Zo community zinga minister leh MLA te, Mizo People’s Convention, Kuki Students' Organisation, Hmar Inpui, Committee on Tribal Unity, Zomi Council Student organization leh pawl dang hruaitu mi 50-te'n nimin khan Chief Ministers' Office conference hall-ah chief minister Zoramthanga an kâwm.

CM Zoramthanga chuan, Manipur-a boruak ṭha lo thleng vanga mipui tam takin harsatna an tâwk chu pawi a tihpui thu a sawi a, "In kal zel dan turah pawl hrang hrang leh mipuite uluk taka inráwn khawmin, ngaihtuahna fím tak nen hmalak a pawimawh. Mizo mipui chuan Zo hnahthlak unaute chu puih an ngaihna laia puih zel an inhuam a ni," a ti.

Inkawmhona chungchang hi CM Zoramthanga chuan social media-ah tarlangin, Manipur Mizote nen inpumkhatna nghet tak nei chunga an inkawm thei chu lawmawm a tih thu leh, Mizo zawng zawng inpumkhatna chauh chu ram leh hnam anga dinchuahna tur bulpui a nih thu a tarlang.

Zoramthanga chuan, Manipur-ah harsatna leh tawrhna thleng zui tawh lo a, nunphung pangngaia an awm leh thuai a duhsak thu tarlangin, "Ram hrang hranga chêng Zo fate hi hnam hrang hrang niin pawl hming hrang hrang pawh nei mah ila unau vek kan ni a, kan inunauna hi engmahin a tihchhiat kan phal tur a ni lo a, kan zavaia kan inpumkhatna chauh hi ram leh hnam anga kan dinchuahna tur bulpui a ni," a ti.