MADC MDC by-election hun puang

State Election Commission (SEC) chuan Mara Autonomous District Council (MADC) chhunga Siaha East-I biala MDC by-election neih hun tur nimin khan a puang a, September 29, 2023-ah inthlan a ni dawn.

Siaha East-I bial hi MDC ni lai a thih avangin seat ruak a ni a, chuvang chuan SEC-in by-election a buatsaih dawn. Inthlan puan a nih avangin in­thlan­na tur bialah Model Code of Conduct puan nghal a ni a; vote thlakna atan electronic voting machine hman a ni ang.

Inthlana chuh tumte tan September 12 thleng hming pek luh theih a ni a, nomination lutte chu September 13-ah endik a ni ang a, inhnûkdâwk duhte tan September 14 tlai dar 3 thleng hun hawn a ni ang. September 29 zing dar 7 aṭanga tlai dar 5 thleng vote thlak theih a ni ang a, vote tlate chu October 3, 2023-ah chhiar tur a ni.

By-election neihna tur Siaha East-I bialah hian voter 2,844 an awm a, mipa 1,307 leh hmeichhia 1,537 an ni.