Lawngtlaiah IPRO leh MJA inkâwm

Lawngtlaia infor-mation & public relations officer Hmingthanzuala leh Mizoram Journalist Association, Lawngtlai district member-te chu nimin khan Lawngtlai Press Club-ah an inkâwm a, thawhho dan tur an sawiho.

Hmingthanzuala chuan, thuthar thehdarh hna chu hna hautak leh inpekna thûk tak ngai a nih thu a sawi a, "Ram leh hnam tana rawngbawlna anga ngai chunga thawh a ṭul. Khawvel changkannain a ken tel media platform hrang hrang hman thiam a ṭul a, mipui náwlpui tana thil ṭangkai leh chhawr tlak thehdarh tam a pawimawh," a ti.

MLA inthlanpui kum a nih angin mahni duh thlanna dik hmang tura mipui zirtir leh vote thlak ngai pawimawh tura inzirtir tamte a pawimawh thu sawiin IPRO chuan, inthlanna felfai leh langtlang kalpui a nih theih nan mawhphurtute theihtawpa thawhpui zel turin journalist-te a sáwm a ni.

MJA Lawngtlai president Lalngheta Ralte chuan, MJA hnathawh dan hrang hrang a sawi a; Lawngtlai district-ah MJA member 10 leh ni tin chanchinbu chhuak panga a awm thu a sawi.

Inkawmnaah hian electronic media hman ṭangkai theih dan tur te, sorkar advertisement kalphungte leh inthlan kaihhnawih thilah mipui zirtir tura thawhho dan turte an sawiho a ni.