MLA-in hostel lungphùm a phúm

Champhai North bialtu MLA Dr ZR Thiamsanga chuan nimin khan Champhai Higher Secondary School, Vengthlang North-ah ST Girls’ Hostel sak tur lungphùm a phúm a; Champhai Medical College leh Mizoram University Eastern Campus din a nih theih nan hmalak zel a tum thu a sawi.

Dr ZR Thiamsanga chuan, "Champhai district-ah zirna a hmasawn zel theih nan sorkar chuan theihtawp chhuah zelin, tun hnaiah MYC Coaching Centre leh Champhai Nursing School-te hawn a ni," a ti a; zirlaite chu ram leh hnam ngaihven tura chahinm, "Nationalism thinlung in put chhoh ve a ṭul. In thiamna leh theihnate hi khawtlang hmasawnna atan hman tum zel ang che u," a ti.

Champhai HSS hi Champhai Town Multipurpose Cooperative Society Ltd (CTM-PACS) hmalaknaa din leh enkawl a ni a, ST Girls’ Hostel chu sikul huam chhungah sak tur niin, cheng nuai 462 hmanga sak tur a ni. CTM-PACS hruaitute chuan Manipur buaina tuar mektu Zo hnahthlakte ṭanpuina atan MLA hnenah Rs 30,000 an hlan.