NAAC accreditation-ah India ramah Mizoramin a hmu sang ber - HTE Minister

Higher & Technical Education (HTE) minister Dr Lalthangliana chuan, National Assessment and Accreditation Council (NAAC) accreditation-ah Mizoramin India ramah a hmuh sàn ber thu a sawi.

Dr R Lalthangliana hian September 5, 2023-a Aizawl Press Club-a thuthar thehdarhtute a kawmnaah, "NAAC accreditation-ah hian India ramah Mizoramin 83% hmuin a hmu sang ber a, min hnaih bertu pahnihna Chandigarh leh Ladakh-in 60% an hmu," a ti.

HTE Minister sawi danin, HTE department hnuaia college/institution valid NAAC accreditation nei 19 an awm. College zingah grade A+ hmu pakhat, A hmu pahnih, B++ hmu pahnih, B+ hmu pahnih, B hmu pariat leh C hmu pali an awm.

Manipur University hnuaia college zinga NAAC grade hmu sang ber chu Rayburn College a ni a, anni hian B++ an hmu a ni.

National Education Policy 2020 leh University Grants Commission ten NAAC accreditation neih vek tur tih chu an thu rolum a nih thu sawiin R Lalthangliana chuan, "Accredited institution ni lo chuan financial assistance an dawng thei lote an ti hial. RUSA guidelines tharah NAAC accreditation valid neite chauh funding pek theih a ni," a ti.