Hri danna pek dan tur sawiho

Lunglei District Task Force for Immunization chuan nimin khan an vice chairman Dr LC Liana, chief medical officer kaihhruaiin a pisaah Intensified Mission Indradhanush (IMI) 5.0 thawh hnihnaa hri danna (vaccine) pek dan tur an sawiho.

Ṭhutkhawmah hian, IMI 5.0 thawh hnihna chu Lunglei leh Hnahthial district-ah September 11-16, 2023 chhungin khaw 94-ah kalpui tur leh district chhunga damdawi-inte leh sub-centre-ahte kalpui turin a rêl. IMI 5.0 thawh thumna chu October 9-14, 2023 chhunga buatsaih tur te, vaccine la thei turte dap chhuah mek a nih thu te, ráltlânte telin hmaih awm loa vaccine pek a nih tur thu sawi a ni.

Tarlan danin, Lunglei leh Hnahthial district-ah hian IMI 5.0 thawh hnihnaa vaccine la thei mi 749 an awm a; kum khat hnuai lam mi 290, kum 1-2 inkar mi 149, kum 2-5 inkar mi 182 leh nu nau pai 128-te an ni.

IMI 5.0 thawh khatna, August 7-12, 2023 chhunga neihah fûr ruahtui tlak tam lai a nih avangin leimin leh tuilian vanga kalpawh harsa khua a awm thu tarlan a ni a; a pumpuiah vaccine pek tura ruahman zinga 13% hnenah pek a ni.