Thawktu dah theih loh avangin Polytechnic thar pathum a ṭáwl

Mizoram district pathum - Kolasib, Champhai leh Mamit district-a cheng vbc. 24 sênga polytechnic sak tawhte chu Mizoram sorkarin thawktu a dah theih loh avangin kum sarih chuang hman ṭangkai lohin a awm tawh.

August 22-23, 2023 chhunga Mizoram Assembly session-a pharh tâk Comptroller and Auditor General of India (CAG) report-a tarlan danin, Ministry of Human Resource Development (HRD) hnuaia Higher Education department chuan kum 2008-2009 khan Mizorama district pathuma polytechnic thar dinna tur cheng vbc. 36.90 a pawm. Polytechnic pakhat atan cheng vbc. 12.30 zel ruahman a ni a, civil work atan vbc. 8 leh bungrua lei nan vbc. 4.30 ruahman a ni.

Polytechnic dinna/sakna tur sum ruahman vbc. 36.90 zinga vbc. 33.27 chu December 2008 aṭanga March 2015 inkar khan HRD chuan a pe chhuak. A sak hna chu Mizoram PWD kutah dah niin, PWD hnenah hian civil work atan cheng vbc. 24 chu August 2010 leh October 2011 inkar khan hlan a ni a; PWD chuan administrative building leh ṭul dangte chu April 2013 aṭanga June 2016 chhungin an sa zo.

Higher & Technical Education (HTE) department hotute'n CAG an hrilh danin, polytechnic pathum zingah Mamit Polyte­chnic building chiah HTE department hnenah June 2018 khan hlan chhâwn a ni a, building zinga ṭhenkhat chu JNV-in an luah. Kolasib leh Champhaia polytechnic building-te erawh chu HTE department hnenah hlan a ni lo.

Kolasib Polytechnic building tur HTE-in an lâk loh chhan chu - tui leh kawlphetha connection a awm loh vang te, ceiling fan leh tubelight vuah a nih loh vang te, inthiarna (toilet)-te a ṭhat tawk loh vangte a ni. Champhai Polytechnic building an lak loh chhan chu - tui herh hawna (water tap) leh bulb vuah a nih loh vang te, building eng emaw zata electric wiring leh zunram thiarna hmanruate rûkbo a nih vangte a ni bawk.

HTE hotute chuan, July 2014 aṭangin thil pawimawh bik (special case) a nih loh chuan state sorkarin sum harsatna vangin hna thawktu tur post thar siam leh post ruak hnawhkhah a khap a, chuvang chuan district pathuma polytechnic tharte chu a taka kalpui theih a ni lo tih CAG an hrilh.

CAG Audit team chuan September 28, 2022 khan Kolasib Polytechnic building chu an tlawh a; in chhung lama electric wiring tih zawh a ni lo a, electric lam hmanrua tam tak a bo tawh a, tukverh darthlalang tam tak a keh a, siam tura tih zinga mi step sira vawnbán (railing) a awm lo a, ruahtui khawlna tur tuizém a awm lo a, tui pump-na a awm lo tih an hmu a ni.

HTE hotute'n October 2022-a CAG Audit team an hrilh danin, HTE chuan polytechnic-te tihpuitlin a nih theih nan kum 2018 khan post 113 siam an rawt a, mahse, March 2018-a Cabinet meeting chuan a pawmsak lo. June 2018 khan sorkarah short term skill development programme kalpui turin post 18 siam rawtna thlen leh a ni a, tihpuitlin a ni lo.

Bungrua/hmanrua chi hrang hrang leina tur cheng vbc. 9.27 erawh chu Finance department-in a pe chhuak lo a, chuvang chuan bung­raw mamawhte lei a ni lo. Bungraw leina tur sum Finance-in a pek chhuah loh chhan chu, polytechnic-te a taka tihpuitlin a nih loh avang leh mamawh leina tur ruahmanna leh dilna Finance-ah thehluh a nih loh vang a nih thu CAG report chuan a tarlang bawk.