Chhingchhip VC chhui nawn turin Court-in ACB leh Lokayukta a hriattir

Chhingchhip village council (VC) chuan ni 100 inhlawhna sum an hman danah fel lo a awma puhna Anti Corruption Bureau (ACB)-in an chhui mek chu tihtawp a nih theih nan eirûk thubuai ngaihtuahtu Special Court (Prevention of Corruption Act) an dil a, Court chuan a lo hnâwl a, chhui nawn leh turin nimin khan Lokayukta leh ACB a hriattir.

Thu dawn danin, Chhipchhip VC hlui chuan MGNREGS aṭangin mipui thawh khawm Rs 7,06,400 an dawng a, mahse, VC thar a din hnuah VC thar hnenah Rs 2,01,559 chauh an hlan a ni. Sum an hlan tel loh Rs 5,04,841 hmanna leh an hnathawh a inmil lo hle nia hriat a nih avangin, chhui chian a nih theih nan VC president thar Lalnunmawia chuan FIR a thehlut a ni.

ACB chuan Prevention of Corruption Act Section 13(1)(2) leh IPC Section 409/477 tlawhchhanin September 12, 2022 khan thubuai an ziak lut a, an chhui ta a ni.

Chhingchhip VC sum hman danah thil dik lo awm ngei nia ACB preliminary enquiry-ah a lan avangin Special Court chuan Chhingchhip VC hmasa member-te'n anticipatory bail an dilna pawh a lo hnâwl tawh.

Hetih lai hian, ACB-a chhui chiangtu (investigating officer) chuan thubuai siamna tur chhan tling awm loa ngaiin Court-ah case tihtawp dilna (closure report) a thehlut a; Court chuan thil dik lo awm ngeia a lan si avangin chhui nawn leh turin thupek (order) a siam ta zawk a ni.

Chhingchhip VC chhuinaa hming langte chu - VCP hlui J Lalduhzuala, vice president hlui Lalremliana, treasurer hlui Lalrinmawii, secretary hlui K Vanlalhruaia, Watson Committee treasurer hlui H Rohnuna te an ni.