Mipui harsatna turin sorkarin chhiah khawn a tum lo - Dy CM

Deputy chief minister Tawnluia chuan nimin khan Khawzawl Zuchhip Vengah State Tax deputy commissioner pisa thar a hawng a; mipui harsatna turin sorkarin chhiah khawn a tum loh thu a sawi.

Tawnluia chuan, Taxation department chu sorkar tana sum la luttu department pawimawh a nih avangin sorkarin a ngai pawimawh tih a sawi a, "Mipui harsatna turin sorkarin chhiah khawn a tum lo. Dan awm sa hnuaia chhiah ṭha taka pek erawh khua leh tui ṭhate awm dan tur a ni," a ti.

Deputy CM chuan, sorkar kum liam ta 2022-23 chhungin Taxation department-in chhiah cheng vbc. 1,020 an la khawm thei chu ropui a tih thu a sawi.

Mizoram sorkarin mahni kutkawih ngeia intodelh a tum thu sawiin, "Mumal zawka inrêlbàwlna kalpui nan Resouce Mobilization department thar sorkarin a din a, Khawzawlah hian Local Administration office leh Transport office hawn tuma hmalak mek a ni a, Revenue department pawh mumal zawka a kal theih nan sorkarin hma a la mek," a ti.

Pisa hawnna inkhawm hi Taxation secretary H Lianzela'n a kaihruai a; commissioner of state tax R Zosiamliana chuan, Taxation department-in GST leh VAT bakah, GST-in a huam loh Petroleum Tax leh Profession Tax an lak thu sawiin, tun hnaia kum nga chhungin target an khûm ziah thu a sawi.

Taxation department hi May 20, 1988 khan Excise department aṭangin a indang. Sorkar thuchhuah tarlan danin, sorkar kum kal mek 2023-24 ah April-August 2023 chhungin chhiah cheng vbc. 492 hmuh a ni.