Lalduhoma'n MLA fund a hman dan MNF Media & Publicity-te'n an sêl

MNF Media & Publicity department chuan nimin khan Aizawl Press Club-ah thuthar thehdarhtute an kâwm a; Serchhip bialtu MLA Lalduhoma, ZPM leader-in MLA fund a hman dan an sawisel.

MNF Media general secretary VL Krosshnehzova chuan, Lalduhoma'n MLA fund a hman dan RTI Act tlawhchhanin an dil chhuah thu a sawi a, "Pu Lalduhoma hian a MLA fund aṭang hian kum 2021 leh 2022 chhungin damlo kan nan Rs 16,42,000 a hmang a, MLA-in a kanna dawngte hi mi 30 an ni. Rs 2,00,000 chuangin damlo paruk a kan a, a bak chu Rs 5,000 chung lamin a kan hlawm," a ti.

MLA-in dam lo a kanna dawngte an lawmpui tih sawiin Krosshnehzova chuan, "Chutihrual chuan, party bil pual leh campaign-na rawngkaiin damlo kanna duhsak biktea a pe ṭeuh ṭeuh mai erawh hriatthiam a har," a ti a; kanna hlâwm lian dawng ve lote an lainat niin a sawi.

MNF Media GS chuan, Lalduhoma'n MLA fund a hmannaah pawl phuah chawp hming a hmang nasa nia sawiin, "Zobawm Welfare Committee, Tualvungi Veng Society, Tlangveng Welfare Committee, Varak Dil Welfare Society, Zion Street Welfare, Saphak Welfare Thenzawl, adt. a hmang. Welfare hminga fund tam tham tak tak a pekte hi pawl tak awm lo, phuah chawp an ni. A veng leh khaw mite pawhin an hre lo," a ti.

VL Krosshnehzova chuan, pawl rintlak tam tak an awm lai leh agency dik - village council an awm laia pawl phuah chawp a hmang duh chuan a rilru a tichiang nia sawiin, "Pu Lalduhoma hian a fund hi Thenzawl bikah phei chuan VC pali awmte hi pakhat mah a pe lo," a ti a; welfare lem hming hmanga hna thawktute chu kalphung thar tlangaupuitu ZPM mi leh sa vek an nih thu a sawi.

MNF Media & Publicity hotute chuan, ZPM chief minister candidate Lalduhoma chu dâwt hmanga MLA fund semah an puh a, "Pawl phuah chawp hmangin an party mite a duhsak hle. A fund a enkawl duh dan aṭang hian zin loh bill a la duh leh Sihhmui khawtlang tui a ru duh kha a mak lo a, a inhmeh hle a ni," an ti.