Mizo ram leh hnam chhan nan dâwih aw chhuah a thiang lo - CM

Chief minister Zoramthanga chuan nimin khan Thenzawl Auditorium-a Mizo Students' Union (MSU) General Conference vawi 21-na a hmanpui a; Mizo ram leh hnam chhan nan dâwih aw chhuah a thiang lo a, an chhuah ngai dawn lo tih a sawi.

CM Zoramthanga chuan, tun hnaia Mizote thlavâng hauh nana Mizoram hmalakna tlangpui a sawi a, "He ram leh hnam chhan nan hian tu lakah mah dâwih aw kan chhuah thiang lo a, kan chhuah ngai hek lo ang. Buai laia huaisen taka mipui tana zirlai pawlin hma a lak ṭhinziate kha theihngilh theih a ni tawh lo," a ti a; ram tana huaisen taka bei tawhtute hnung zui a, hmangaih taka Mizo ram leh hnam enkawl turin zirlaite a chah.

Zirlai, zirna piah lama ram leh hnam hmangaihna thinlung pû tam tak an awm chu thlamuanthlak a tih thu sawiin Zoramthanga chuan, "Kan chhehvela harsatna thlengte vanga lo kal kan unaute tana in hnathawh hmutute kan ni a, in thil tihte hi a chhuanawm a ni," a ti.

Chief Minister chuan, tun hnaia Mizoram chhehvela buaina leh harsatna vanga Mizoram pantu Zo hnahthlakte an beisei anga rálmuanga Mizorama an awm chu a hlut thu sawiin, "Chutiang lo tihsak thei ram, khawvela ram rálmuang ber zinga mi Mizoram neitu kan ni hi a hlutzia i ngaihtuah ṭhin ang u," a ti a; buaina naménlo paltlang hnua ram ralmuang ni ta Mizoram huháng a nat thu a sawi.

CM Zoramthanga hian MSU magazine 'Kulva' a tlangzarh a; Myanmar aṭanga ráltlânte Mizo­ramin a lo tuamhlâwm vanga an lawmzia tihlan nan The Ladies Orga­nisation-in thuchei an hlàn a ni.

MSU inkhawmpuiah hian khualzahawm Robert Romawia Royte, minister of state pawhin thu sawiin, "Mizoram leh India sorkar inremna thuthlung kha a hlu em em a, hmasawnna duhawm tak tak kan hmuh zel bakah Article 371G hnuaiah kan hnam kan ram hi vên tlat a ni. Ṭhalaite hian ram leh hnam hmangaihna rilru i pu zel ang u," a ti.