MPCC President-in politics-a lut turin Mizo ṭhalaite a sáwm

Mizoram Pradesh Youth Congress Committee (MPYCC) chuan nimin khan Vanapa Hall-ah State Convention an buatsaih a, MPCC president Lalsawta leh Congress Legislature Party (CLP) leader Zodintluanga Ralte ten an hmanpui. Lalsawta chuan, politics-a lut turin Mizo ṭhalaite a sáwm.

MPCC President chuan, ram rawngbawl turin Pathianin ṭhalaite a ko niin a sawi a, "Politics hi a sír aṭanga lo thlir ringawt hian awmzia a nei lo. Ṭhalai mi thiam tak tak, politics ngaihven lêm lote pawh kan ram chhe mek siamṭha leh tur hian a chhunga an rawn luh ve a ngai tawh a ni," a ti.

India ram pumah BJP sorkarin lal a hrawt mek nia sawiin Lalsawta chuan, "Kan ram, kan hnam leh kan sakhua nasa taka suasamin, a him lo em em tawh. Kan dinhmun tawn mek aṭanga kan tâl chhuah leh theihna tur leh kan ram siamṭha leh tura ngaihtuahna nasa tak séng tur hian Lalsawta'n a ko lo che," a ti a; Pathianin ram siamṭha turin ṭhalaite a koh thu a sawi a ni.

MPYCC State Con-vention-a khualzahawm Zodintluanga Ralte chuan, ṭhalaite'n sorkar hna dik taka lak an duh avangin Congress party an sorkar leh hun an nghâkhlel niin a sawi.

Zodintluanga Ralte chuan, ṭhalaiin dik taka sorkar hna thawk tur la ṭhin Congress party an sorkar leh hun an nghâk­hlel nia sawiin, "Congress sorkar leh hun mipuiin an nghah­hlelh leh tawhna chu ṭhalai zingah a thiamte'n hna an hmu leh dawn tih hi a ni," a ti.

Congress party chu Mizoram, rambuai ata remna leh muanna thlentu leh hmasawnna thlentu a nih thu sawiin Zodintluanga chuan, "Congress hi a ni lo'm ni kan ramah remna leh muanna thlentu chu? Kan ramah rambuai vanga kum tam tak hmasawnna a ṭhuanawp reng hnuah remna leh rálmuanna avangin vawiinah chuan hma­sawnna neiin kan awm a ni," a ti a; Mizoramah remna a awm theih nan Congress party-in thâ an thawh nasat thu a sawi.

MPYCC State Con-vention hi MPYCC sr. vice president Ngur­dingpuia Pachuau-in a kaihruai a, MPYCC president Laltawnliana'n inlawmna thu sawiin, resolution panga an pawm.

MPYCC resolution

■ MPCC President Lalsawta kaihhruaina hi kan ring tawk a, ani ho hian sorkar ṭha leh thianghlim, Zoram mipui mamawh kan siam ngei ang.

■ Sorkar hnathawkte a hun taka hlawh la thei loa an awm hi MPYCC chuan pawi kan ti a, sum enkawl thiam Lalsawta ho ngeiin a hun taka hlawh an lak leh ngei theih nan sorkar hnathawkte tan kan ding tlat dawn a ni.

■ Mizorama party hrang hrang zingah kan ram, kan hnam leh sakhua a him theih nan, Congress party lo chu party dang an awm loh avangin Pu Lalsawta kaihhruai Congress party hi kan ring tawk a ni.

■ India ramah BJP kaihhruai sorkar NDA-in Uniform Civil Code leh One Nation, One Election kalpui tumin hma a la mek a, hemi titawp tura Indian National Congress kaihhruai, party hrang hrang 28 Indian National Developmental Inclusive Alliance inzawmkhawmte hmalakna hi kan thlawp a, Mizorama party dangte pawhin thlawp ve ngei turin kan ngen a ni.

■ MPCC election manifesto 'Ṭang Puihna' hi din chhuah tum tak taka ṭang, ṭhalai, kut hnathawkte, ṭan ngaihna hre tawh lo khawpa dinhmun tleu tawhte leh kawng hrang hranga eizawngtute tan ṭha kan ti tawk a ni.