Mipuiin kalphung thar sorkar hmêl hmuh hlàn an nghâkhlel - Sapdanga

ZPM working president K Sapdanga chuan, Mizoram mipuiin inthlan an châk tawh a, kalphung thar sorkar hmêl hmuh hlàn an nghâkhlel tawh niin a sawi.

K Sapdanga hian ZPM Zonu Headquarters-in Vogue Resort-a Project 50 hawnna leh political training an buatsaih a hmanpuinaah thu a sawi a, "April thla khan kan intifel thawkhat a, bial hrang hrangah candidate-te'n tlin ngei tumin theihtawpin an bei mek. Mipui hian inthlan kan châk tawh hle mai a, kalphung thar sorkar hmél an duh tawh niin a lang. Mipui náwlpui titi pawh politics chungchang a ni," a ti.

Ṭhangtharte'n inthlan an nghâkhlel hle tih sawiin K Sapdanga chuan, "An hmakhua an ngaihtuah a, ram dinhmun an thlir a, sorkar thar hrawn an nghakhlel tawh hle. Kut hnathawktute'n dinchhuah hlan an nghâkhlel a, sorkar hnathawkte hlei hlei hian a hun taka hlawh pe thei tur sorkar thar an mamawh tawh a ni," a ti a; politics-in khawtlang leh kohhran thlenga a nghawng avangin dinhmun ṭha zawka Mizoram siam turin kalphung thara kal a ṭul thu a sawi.