Women's Polytechnic-in silver jubilee an lawm

Women's Polytechnic, Aizawl chuan nimin khan an hmunah silver jubilee an lawm a, Higher & Technical Education (HTE) minister Dr R Lalthangliana'n hman-puiin, jubilee souvenir 'Thadang' a tlangzarh.

Women's Polytechnic-ah hian September 7, 1998-ah zirna ṭan a ni a, class ṭan ni hi a din ní-ah ngaih a ni. Silver jubilee hi September 4-7, 2023 chhung an lawm a, nimina an lawmnaah hian principal ni tawh mi pali hnenah chawimawina hlan a ni.

HTE Minister chuan, Women’s Polytechnic zirlaite chu eizawnnaah hlawhtling taka an chhawr chhuah a duhsak thu sawiin, "Sorkar hna kan indaih sèn vek loh avang leh economy-in hma a sawn zel nan mahni kutkawih eizawnna te, private enterprise-a thawhte a nachang hriat zel a ṭha. Hetiangah hian innghahna tham thiamna pe tura Women Polytechnic-in zirtirna a pe hi a lawmawm hle a ni," a ti.

Jubilee lawmnaah hian principal Dr H Lalchhuanvela pawhin thu a sawi a ni.