Congress party laka fimkhur turin BJP-in Mizoram mipui an chah

BJP, Mizoram Pradesh chuan thuchhuah siamin, inthlan dawn hnaih apiangin Congress party-in dâwt hmangin BJP beih rûnpui an nei ṭhin niin an tarlang a, Congress party lakah fimkhur turin Mizoram mipui an chah.

Mizoram BJP chuan, MPCC thupuangtu Dr Lallian­chhunga'n press conference a neiha a sawite chu mipui thluak sûk tumna a nih thu tarlangin, "Inthlan dawn hnaih apianga dâwt hmanga BJP beih rûnpui an nei ṭhin leh ram hmangaih anga an inlan hun a thlen leh mek avangin Mizoram mipuite fimkhur tur leh thu dik hriat tum zel turin kan ngen a ni," an ti.

Congress party-in kum 60 chuang India ram an enkawl hun chhungin India ram mipui an sawisak dan ngaihtuahin, Mizoramah chuan Congress party chu awm tawh lo hial zawk àwmah an ngaih thu an tarlang a, "March 5, 1966-a Aizawl bakah khaw tam tak thlawhna aṭanga silaia an kâp leh bomb hmanga min beih kha a rapthlak hle a, pawisawilo nunna hlu tak tam tak kan chán a ni," an ti a, Congress party chu Mizoram tan a him lo hle zawk niin an sawi.

Mizoram BJP chuan, Congress party-in lalna leh thuneihna an chan theih nan pawisak an nei ngai lo nia sawiin, "Rûkru party an ni a, lemchang thiam an ni tih hi Mizoram mipuite'n kan hriat thar kan duh," an ti a; mipui náwlpui bum nan India flag ang takin party flag an siam thu te, UPDA tih ṭhin chu India hming angin I.N.D.I.A tia an vuah mek thu an tarlang bawk.