EMRS Cultural & Literary Fest hman a ni

Social Welfare & Tribal Affairs minister Lalrinawma chuan nimin khan Mizoram Univer-sity Multipurpose Hall-ah 2nd Mizoram EMRS Cultural & Literary Fest a hawng. Minister hi Mizoram Eklavya Model Residen-tial School Society-ah chairman a ni.

EMRS Cultural & Literary Fest hi sorkar laipuia Ministry of Social Welfare & Tribal Affairs hnuaia National Education Society for Tribal Students, Mizoram sorkara Social Welfare & Tribal Affairs department leh Mizoram EMRS Society-te buatsaih a ni a, Mizorama EMRS paruk aṭangin zirlai leh zirtirtu 150 an tel. Vawiinah chhunzawma zawh a ni ang.

Lalrinawma chuan, thu leh hlain thil a ti thei tih sawiin, "Mizo history-ah thu leh hla vangin indona leh inremna hmuh tur a awm. Hnam nunphung leh ziarángte zahpui loa chawi nun zel a pawimawh," a ti a, hnam ziaráng leh nunphung hloh chu hnam bo zia a nih thu a sawi.

SWTA department-in hnam nunphung leh ziarâng vawng nung turin theihtawp a chhuah thu sawiin Minister chuan, zirlaite chu Mizo hnam ro hlu, ziaráng, ṭawng leh nunphungte zahpui loa chhawm nung zel turin a fuih.

Khualzahawm David Zohmangaiha, AMC councillor pawhin thu sawiin, zirlaite chu ram leh hnam tana chhawrnahawm nih tum tur leh hnam ropui siam tura ṭhahnemngai taka inzir turin a chah.

SWTA tarlan danin, Mizorama EMRS hmasa ber chu kum 2008 khan Lunglei Puk­puiah din a ni a, kum 2015 khan Serchhip din leh niin, kum 2020 aṭangin Lawngtlai, Chawngte, Tuipang leh Ngopaahte din leh a ni. EMRS parukah zirlai 1,210 an awm mek a; Lunglei leh Serchhipah pawl 8 thleng zir theih niin, a dang paliah pawl 10 thleng zir theih a ni.

Noaotla (Niawhtlang), Tlangnuam, Tlungvel, Bilkhawthlir leh Zawlnuamahte EMRS sak mek a ni a; Khawbung, Khawzawl, Sawleng, Thiltlang, Lungsen leh West Phaileng-ahte EMRS din turin sanction hmuh tawh a ni bawk.