DGP-in Saitual police-te a tlawh

Director General of Police (DGP) Anil Shukla chuan nimin khan Saituala police-te a tlawh a, thuthar thehdarhtute nen an inkâwm. Saitual district-ah police 141 awm tura ruahman a nih laiin, mi 80 chiah an awm thu tarlan a ni.

Thuthar thehdarhtute nen an inkawmnaah Anil Shukla chuan, district hrang hranga police-te a tlawh chhan sawiin, "Ruihhlo tawlhrûk leh hman sual dona turah police-te'n chak zawka hma an lak theih nan te, inthlanpui awm tura police-te inpuahchah dan enfiah leh police kalphung leh hmanruate endik bakah, an mamawh hriatte a ni," a ti.

Saitual SP conference room-a police-te nen an inkawmnaah DGP chuan, hna an thawh ṭhatte chhunzawm zel turin a chah a; harsatna leh an ngaih pawimawh an sawiteah a theih anga hmalakpui a tum thu a sawi.

DGP chuan, Mizorama police tam tak, an service laia an thi ṭhin chu pawi a tih thu sawiin, an hriselna ngai pawimawh turin a chah a, "Ruihhlo donaah theihtawpin hma la u la, lirtheia chetsualna a tlem theih nan road safety chungchangah hmalakna khauh tak neih a ṭul," a ti a; Saitual SP chu thawktute tan medical check-up ruahman turin a hrilh bawk.

Saitual SP Pukhraj Kamal sawi danin, Saitual district-ah hian police sub-division pakhat leh police station pahnih a awm a, police awm tur zat ruahman (sanctioned strength) chu 141 a nih laiin, mi 80 an awm mek a ni.