N Vanlaiphai VC chhuina tihtawpsak

North Vanlaiphai VC-in college fund atana MGNREGS aṭanga mipui sum thawh khawm an hman a dik lo nia sawi chungchang ACB-in an chhui a, ACB case investigating officer-in an chhuina tihtawp a dilna (closure report) a thehluh chu eirûk thubuai ngaihtuahtu Special Court (Prevention of Corruption Act) chuan nimin khan a pawm.

N Vanlaiphai VC-te'n MGNREGS aṭanga mipuiin sum an thawh khawm an hman danah dik lo a awm nia hriat a nih avang hian report a luh angin Anti Corruption Bureau (ACB) chuan July 5, 2022 khan Prevention of Corruption Act Section 11/13(2) hnuaiah thubuai an ziak lut a; hun eng emaw chen an chhui hnuah thubuai tihtawp dilna Special Court-ah an thehlut a, Court chuan a lo pawm ta a ni.

Additional Public Prosecutor chuan, case IO-te'n thubuai tihtawp dilna an thehluh chu court tan táwng­páwng pawm ngawt chi a ni lo tih tarlangin, "Report ngun takin a lo enfiah ang a, thubuai chhui danah hmaih palh emaw, felhlel emaw awma a hriat chuan a pawm loin, thubuai a chhui ṭhattir thei a, chhui ṭha loin thubuai a kalpui nghal thei bawk. A duh chuan thubuai thehluttute pawh an ngaihdan sawina hun a pe thei a, a duh chuan closure report chu pawmin case a titawp thei bawk," a ti.

Additional PP chuan, N Vanlaiphai VC-te'n sum leh pai enkawl dan (financial management) an zir nasat a ngaih thu te, dan ang taka sum an vawn loh chuan eirûk thubuai awrh theih a nih thute a tarlang bawk.