KHAWTHLIR

Thisen pe

Mizoram Hindi Training College NSS leh Red Ribbon Club chuan nimin khan Synod Hospital blood centre tan thisen unit 19 an pe a, petute mipa 15 leh hmeichhia pali an ni.

In thar hawng

Deputy chief minister Tawnluia chuan nimin khan Khawzawl College academic & warden/staff building thar a hawng. Minister chuam, zirlaite chu ṭhahnemngai taka zir turin a fuih.

Hlawh pe chhuak

Mizoram sorkar chuan sorkar hnathawkte hlawh tur nimin khan a pe chhuak. Thu dawn danin, Finance department chuan nimin khan sorkar hnathawkte hlawh tur a vaiin a pe chhuak a, department lam pawhin thawktute account-ah an thun nghal a ni.

Kudam tur sawiho

FCSCA minister K Lalrinliana hoin nimin khan a pisaah Supply department leh PWD hotute'n Sairanga Supply kudam lian sak tur an sawiho. Zuangtuia Supply kudam chu Sairangah sawn tum a ni a, kudam pathum sak tum a ni. SASCI sum nuai 830 leh NABARD sum nuai 487 sênga sak tura ruahman a ni.

IPRO leh MJA

Mamita Information & Public Relation officer Dr Saithantluangi Zote chuan September 6, Nilaini khan a pisaah Mamit district MJA member-te a kâwm a, thawhho dan tur leh hmachhawpte an sawiho. MJA member-te chuan, sorkar thu puan chhuahnaah thawhhona ṭha tak hnuaia kal tlân a ṭul thu leh IPR department chungah rinna leh beiseina an neih sàn thu an sawi.

Red Ribbon Quiz

MSACS leh Siaha District AIDS Prevention and Control Committee chuan nimin khan Siahaa Don Bosco School-ah Red Ribbon School Quiz an buatsaih a, bawrhsap Lalhmunsanga Hnamte-in a hmanpui. Quiz-ah hian Maraland Academy chu pakhatna niin, Rs 5,000 leh thuchei an dawng a, Mizoram pum huap quiz intihsiakah Siaha district aiawhin an tel dawn a ni.