Ballon d'Or: Messi & Haaland an langsar; Ronaldo a tel ve lo!

Football khawvela mimal chawimawina ngaihhlut hlawh ber Ballon d'Or dawng thei tur hming 30 chhawpchhuah a ni ta a, France Football-in hming a tarlan zingah Lionel Messi leh Erling Haaland te hming a langsar hle.

Hetihlai hian Al Nassr forward Cristiano Ronaldo erawh kum 2003 hnua a vawi khat nan a hming a lang ve lo a, football khawvelin player ropui bik Ronaldo a mangṭha mek - a lunglenthlak lawk tlat!

Treble champion Manchester City player-ten nomawi pathum ngawt an chawi lawmman an dawng a, City player pasarih chu he award dawng thei tur hian an hming a lang - club mala player thawh hnem ber an ni. An player lang zingah Josko Gvardiol chu season hmasa an zinga khel lo ni mah se, season hmasa captain Ikay Gundogan chu Barcelona player angin a lang ve thung.

Player 30 zingah European football-a awm lo player pahnih an tel a, chungte chu Inter Miami forward Lionel Messi leh Al Ittihad striker Karim Benzema te an ni - a bak player 28 erawh Europe-a khel vek an ni thung.

Messi beiseina

Nikum khan Ballon d'Or dawng thei zingah Messi hming chhawpchhuah a ni lo a, mi tam takin Argentine forward hun a liam tawhah an ngai hman - mahse, Messi-a'n ngaihdan dang a lo nei a, award sem a hun leh meuh chuan a dawng awm ber a ni leh der tawh!

Messi hian Paris Saint-Germain-ah beisei angin hna thawk lo mah se, Argentina chu World Cup nomawi a chawipui a, Argentine forward hian football a thleng chhuak tawh, tia sawi ngam a ni.

Football khawvela nomawi chawi theih zawng zawng chawitu Messi hian World Cup nomawi a chawi a ni satliah lo - final boruak sangah goal hnih a khung a, inelna pumpuiah goal sarih a khung a, Best Player (Golden Ball) lawmman a dawng bawk.

Messi hian World Cup zawhah France chhuahsanin, USA lam a pan zui a, MLS club Inter Miami-a a thawm chu na tak a ni - award-ah hian season liam taa an chet dan en tur ni mah se, vote thlak laia an boruakin nghawng thui tak a nei ang tih a chiang.

Haaland hi

Messi-a'n khawvela footballer ṭha ber chawimawina Ballon d'Or hi vawi sarih ngawt dawng tawhin, a dawng hnem ber a ni a, amah hnaih bertu Cristiano Ronaldo chuan vawi nga a dawng tawh thung - Haaland erawh top three-ah pawh a la lang ngai lo.

Mahse, kum 23 mi striker hian season hman zawh takah khan City tan match 53 khelin goal 52 ngawt a khung a, treble champion a nihpui bawk. A hnathawh hi a ropui hle - season dang ni se Ballon d'Or dawng chiang tur ang hiala sawi theih a ni a, mahse, World Cup-a Messi champion hian a dinhmun a tiderthawng.

Haaland hian season liam taa mimal chawimawina dawn theih ang chu a hui vek, tiin a sawi theih. Premier League Player of the Season leh Young Player of the Season-ah thlan a ni a, PL Golden Boot a dawng a, PFA Players' Player of the Year-ah thlan a ni bawk.

Hei chauh a ni lo - FWA Footballer of the Year-ah thlan a ni a, Champions League-ah goal 12 khunga top scorer niin, UEFA Men's Player of the Year-ah thlan a ni bawk - Ballon d'Or chiah hi kim lo a ni tawh!

Player dang

City treble champion nana tha thawhhlawk zingah Kevin de Bruyne a langsar a, mahse, Haaland a awm ve tak miau avangin Belgian midfielder tan top three chu beisei san theih ber ni maiin a lang.

Spanish midfielder Rodri hian mite angin ngaihven hlawh lo mah se, UEFA Champions League Player of the Season-ah thlan a ni a, Spain chu Nations League nomawi chawipuiin UEFA Nations League Finals Player of the Tournament atan thlan a ni bawk.

Paris Saint-Germain forward Kylian Mbappe pawh a hming lang mah se beisei tihsan viau a har a, Serie A-a Napoli champion puitu Khvicha Kvaratskhelia, Victor Osimhen leh Kim Min-jae te pawh an hming a lang hrim hrim hi an lawm ang.

Real Madrid-a bul ṭan ṭha êm êm mai Jude Bellingham pawh lawmmawn dawng thei zingah a tel a, Barcelona striker Robert Lewandowski pawh a lang - mahse, Lewy tan pawh beisei tihsan viau a harsa.

Premier League & SPL

City player chhiar tel lohin, Premier League-in player panga an thawh a, Arsenal-in Bukayo Saka leh Martin Odegaard an thawh - Liverpool forward Mohamed Salah pawh a lang ve leh a, beiseina erawh a sang viau hran lo ang.

Player lang dang pahnih hi goalkeeper an ni a, Manchester United keeper Andre Onana leh Aston Villa goalkeeper Emiliano Martinez te an ni - Onana hi a club hmasa Inter Milan tana a chet ṭhat vanga lang a ni a, Martinez hi World Cup-a Argentina champion nana a thawhhlawk avanga lang a ni.

Kum 30 mi Harry Kane pawh hming chhawpchhuah zingah a tel a, season hmasa khan Tottenham Hotspur tan match 49-ah goal 32 a khung - tunah erawh Bayern Munich player a ni tawh a, German club tan match liah goal thum a khung leh der tawh.

Saudi Pro League aṭangin player pahnih an lang a, Karim Benzema bakah Al Hilal si ban nghaktu Yassine Bounou a lang. Morocco keeper lan chhan erawh season hmasaa Sevilla tana a hnathawh ṭhat vang a ni.

Thlan dan

Ballon d'Or hi August 1, 2022 - July 31, 2023 inkara player khelh dan aṭanga teha sem tur a ni a, October 30-ah award hi sem tur a ni ang - Ballon d'Or Féminin, Kopa Trophy, Yashin Trophy, Socrates Award, Gerd Müller Trophy leh Club of the Year award pawh sem nghal a ni ang.

France Football magazine chuan Ballon d'Or hi a buatsaih ṭhin niin, vote thlak dan pawh thlak fo niin, tun hma chuan national team captain leh coach te pawhin vote an nei ṭhin a, kum 2022 aṭang khan FIFA ranking top 100-a lang pha chin ram journalist-te chauhin an thlak thei tawh.

Ram khat aiawhin journalist pakhat ṭheuhin vote hi an thlak a, India pawh FIFA ranking-ah 99-na kan nih avangin vote kan nei ve leh dawn, tihna a ni - journalist-te hian hming chhawpchhuah aṭangin player panga an thlang chhuak ang a, ṭha an tihdan indawtin point an pe ang.

Pakhatna chu point ruk pein, pahnihna - point li, pathumna - point thum, palina - point hnih, pangana - point khat an pe ṭhin ang. Heta an point hmuh hi belhkhawm lehin, a pumpuia point hmu sang ber chuan award hi a dawng dawn a ni.