International Literacy Day: Kum 2023-24 chhungin ziak leh chhiar thiam veknaah Mizoram puan tum a ni
Nimin September 8 kha International Literacy Day a ni a, School Education directorate conference hall-ah hman a ni. Khuallian School Education secretary Dr Lalzirmawia Chhangte chuan, Mizoram bakah state dang pahnih leh union territory-te chu kum 2023-24 chhungin ziak leh chhiar thiam vekna, literacy rate 100%-ah puan tum a nih thu a sawi.
International Literacy Day hmanna hi School Education additional director Lalhmachhuana'n a kaihruai a, School Education department, SCERT, MBSE leh Samagra Shiksha-a officer-te an tel. Day thupui chu, 'Khawvel insiamrem meka ziak leh chhiar chawisan nan: Khawtlang nun nghet leh muanawm nghahchhan siam' tih a ni.
Dr Lalzirmawia Chhangte chuan, literacy chungchangah August 21, 2023 khan online hmangin meeting neih a nih thu sawiin, "India sorkar chuan UT zawng zawng leh state ṭhenkhat ziak leh chhiar thiam lo an tlemna - Goa, Mizoram leh Sikkim-te chu kum 2023-24 chhungin ziak leh chhiar thiam zaa za (100%)-a puan a tum. Meeting-ah hian UT-te leh state pathumte'n ziak leh chhiar an thiam vekna tur ruahmanna siam a ni," a ti.
School Education Secretary chuan, centrally sponsored scheme (CSS) thar Education for All (Adult Education tih ṭhin) New India Literacy Programme (NILP) chu kum 2022-23 aṭanga 2026-27 chhunga hman turin sorkar laipuiin a pawm thu a sawi a, "Sum senso tur chu cheng vbc. 1,037.90 a ni a, kum 15 leh a chung lam ziak leh chhiar thiam lo zawng zawngte tan a ni," a ti a, National Education Policy (NEP) 2020 rawtna nena inmila duan a nih thu a sawi.
Literacy chu ram leh khawtlang hmasawn tehna pawimawh a nih thu sawiin Dr Lalzirmawia chuan, "Mipuite'n ziak leh chhiar an thiam loh chuan an ram a boral mai dawn. Chuvang chuan ram tam takin literacy hi mihring dikna chanvoah an pawm tawh. Literacy hi zirna innghahna lungphûm a ni a, mahni inngaihhlutna a siam a, nunphung a tichangtlung a, hriselna a ti ṭha a, retheihna ûm bo nan a ṭangkai," a ti a; ziak leh chhiar thiamnain mipa leh hmeichhia inthlauhna a tihziaawm thu a sawi bawk.