September 2023 chhungin SEDP 2nd phase sem tum a ni - Tawnluia

Deputy chief minister Tawnluia chuan nimin khan Khawzawlah Chief Medical Officer (CMO) pisa leh District Research Office thar a hawng a; September 2023 chhungin SEDP second phase sem hman tum a nih thu a sawi.

District Research Office pisa hawnnaah Tawnluia chuan, hripui léng vangin Mizoram sorkarin harsatna tam tak tâwk mah se, sorkar flagship programme SEDP first phase-ah mi 60,000 hnenah ṭanpuina pek a ni tawh tih a sawi a, "Second phase-ah mi 60,000 bawk tuamin September thla chhung hian sem chhuah hman tum a ni," a ti.

Tawnluia chuan, "Mizoram sorkarin mi tin huap zo hmasawnna kalpui a, retheite khaichhuah a ngai pawimawh a, hripui léng kara sorkar hmalaknate'n rah ṭha a chhuah chho mek a ni," a ti a; Mizoram sorkarin remna leh muanna, ei leh bâr hnianghnar, mipui ni tin nun awlsam zawknate leh hriselna lama hmasawnnate a ngaih pawimawh thu a sawi.

Khawzawl CMO pisa hawnnaah Tawnluia chuan, "District thar pathum Khawzawl, Hnahthial leh Saitual damdawi-inte district hospital puitling anga an awm theih nan post siam belh leh a awm sa hlân kai a ṭul a, DPAR-in hma a la mek a ni," a ti a; Khawzawl district-ah department la awm lote dah belh zel tum a nih thu a sawi bawk.

Khawzawl CMO pisa hi cheng nuai 418 sênga sakin contractor Lushai Engineers-in an sa a; District Research pisa chu cheng nuai 43 sênga sak a ni.