MNF sorkar hi ṭawngṭai chhanna a ni - MNF Treasurer

MNF treasurer K Vanlalauva chuan, MNF kaihhruai sorkar chu ṭawngṭai chhanna a nih thu leh, Chief Minister chu dâwt tinrengin bei ṭhin mah se, an ṭawngṭai chhanna kal zel a nih thu a sawi.

K Vanlalauva hian nimina Mizo Hnam Rûna inkhawmah thu sawiin, "Ram vei kohhran hruaitu kan neih avangin kum 2018 MLA inthlan dawnah khan kan ṭawngṭai a, tuna sorkar mek hi kan ṭawngṭai chhanna a ni. Kan Chief Minister hi dâwt tinrengin bei ṭhin mah se, kan ṭawngṭai chhanna kal zel a la ni," a ti.

Party awmna sawn reng mai chu hruaitu an ni tak tak thei lo nia sawiin K Vanlalauva chuan, "Kan ṭhalaite hian leader nghet leh rinawm an zawng. Leader ṭha, mahni thuthlunga ding nghet chuan huaisen takin hma an la ṭhin," a ti a, ram hruaitu atan mi nghet zawn a ṭul thu a sawi.

MNF Lawngtlai district president Lalzahawma pawhin thu sawiin, Lawngtlai district-a MLA bial pahnih - Lawngtlai East leh Lawngtlai West-ah MNF an chak dawn tih a chiang niin a sawi a, "Lawngtlai West bialah mipui 90%-te'n MNF candidate a tlin an ring, inhnehna sang ber kan siam thei hial ang. Lawngtlai East-ah inbeih rawn ni lo, kil thum aṭanga kan inbei a nih chuan kan chak chiang hle ang," a ti.