Manipur-a Zo hnahthlak pum huapa hmalakna atan Zo United din a ni

Mizorama NGO Coordination Committee kaihhruainaa Manipur-a Zo hnahthlak páwl hrang hrang hruaitute September 7, Ningania Central YMA Committee Room-a inhmukhawm chuan páwl pakhata an inkhaikhâwmna turin Zo United tih hminga hmalakho an rêl.

Manipur-a Zo páwl hrang hrang aiawhte chuan, Manipur-a Zo hnahthlakte zingah inpumkhatna leh thawhhona ṭha a awm theih nan Zo United pawl din phawt an rél a; Pawl hming pawh hnam bil hminga phuah loin, Zo hnahthlakte inpumkhatna leh thawhhona turin Zo United an vuah a ni.

Zo United hruaituah hian Zo hnahthlak hnam hrang hrang leh tribe aiawh pakhat ṭheuh leh, Indigenous Tribal Leaders Forum (ITLF), Committee on Tribal Unity (COTU) leh Hill Tribal Council (HTC) aiawh mi pakhat ṭheuh tel turin an rél a; September 20, 2023 ral hmain Zo United hruaitu tur inruat ni se, an ti.

Manipur-a Zo hnahthlak páwl hrang hrang inthlun zawmna tura pawl ding tawh, eng emaw vanga ding mumal ta lo Coordination Committee on Separate Administration Manipur (CORSAM) leh Joint Inpi Council (JIC)-te chu ṭhiah ni se, an ti bawk.

Joint NGO kaihhruaia inhmuhkhawmah hian Joint NGO hruaitute bakah, Manipur-a Zo hnahthlak pawl hrang hrang aiawh 16 leh MLA paruk an tel a ni.