Hmeichhe naupang khuaikhemtu Kum 20 chhung táng turin hrem
Hmeichhe naupang kum 6 mi khuaikhemtu Laldingluaia (61) s/o Thangkunga (L), Thingdawl Hmarveng chu kum 20 chhung hrehawm taka jail-a táng tur leh Rs 10,000 chawi tura hrem a ni a; pawisa a chawi loh chuan thla khat dang tàn belh tura tih a ni bawk.
Kolasib-a additional district & session judge Julie Lalrinzami, Fast Track Court judge ni bawk chuan Laldingluaia chu puh a nihnaah August 29, 2023 khan thiam loh a chantir a; September 6, Ningani khan hrem dan tur a puang.
Court judgement-a tarlan danin, Laldingluaia hian December 23, 2021 khan naupang kum 6 mi chu mipat hmeichhiatna lam hawiin a khawih a, December 23-ah vêk a lakah FIR thehluh a ni. Police-te'n chhui zuiin, March 3, 2022 khan court-ah chargesheet an thehlut.
Additional District & Session Judge chuan, vanduaina tâwk naupangin 'Mizoram Victim of Crime Compensation Scheme 2011' kaltlangin zangnadawmna a dawn theih nan hma la turin Kolasib District Legal Services Authority a hriattir nghal bawk.