Ram, hnam, sakhua humhim theitu tur Congress lo chu an awm lo - Nunmawia

MPCC vice president Lalnunmawia Chuaungo chuan nimin khan Congress Bhavan-a political session-ah thu sawiin, Mizoramin thil hlauhawm a hmachhawn mek niin a sawi a, "Congress lo chu kan ram, kan hnam, kan sakhua min humhimsak theitu tur an awm lo," a ti.

Lalnunmawia Chuaungo chuan, "Tunah hian Mizoram hian thil hlauhawm kan hmachhawn leh mek. Hnam tlêm zawk leh sakhaw tlem zawkte che thei loa min siam hi BJP thil tum ber a ni a... Hnam hnufual zawk leh tlem zawkte dinhmun hi BJP sorkar hnuaiah a him lo a ni," a ti a; BJP-in Manipur-ah hleih nei taka ro an rêlna chu Mizote'n an tawrh thu a sawi.

Sorkar laipuia BJP chakna titawp turin kumina state panga inthlan a pawimawh tih sawiin Lalnunmawia chuan, "Chu'ng zingah chuan Mizoram general election pawh a tel. India rama Congress a thawh kân leh theihna turin Mizoramah Congress an sorkar a ngai. Congress lo chu kan ram, kan hnam, kan sakhua min humhimsak theitu tur an awm lo," a ti.

MPCC Vice President chuan, India rama Muslim state awm chhun Jammu & Kashmir chu an inhumhimna turin Constitution-ah dan ṭha tak awm mah se, BJP-in a ṭhiat a, union territory-ah a dah tih sawiin, "Tunah chuan India ramah Muslim state a awm tawh lo," a ti. India rama Kristian state pathum zinga mi Mizoram chu ILP hmanga hum him ni mah se, BJP sorkarin a duh chuan a ṭhiat thei tih sawiin, Manipur-a an chêt dan enin, khawvel mithmuha mualpho pawh BJP sorkarin engahmah a ngai lo tih a sawi.

Lalnummawia Chuaungo chuan, Congress party chu Mizorama remna leh muanna thlentu a nih thu a sawi a; India rama zirna-in principle leh dean atan BJP-in anmahni mi leh sa, Hindu kulmûk dah an chíng nia sawiin, "Kan sakhua hi nasa taka nêkchêp an tum a, an nékchêp mek zel. Nakum Lok Sabha inthlanah Congress leh a thawhpuite an sorkar ngei ngei a ngai," a ti.