Leiba nei tlem ber, BPL awm lohna state-ah kan siam dawn - BJP President

BJP, Mizoram Pradesh president Vanlalhmuaka chuan, Mizoramah BJP an sorkar chuan Mizoram chu kum nga chhungin India ram state zinga thawh chhuah ngah ber, leiba nei tlem ber leh below poverty line (BPL) awm lohna state-ah an siam tur thu a sawi.

Vanlalhmuaka hian nimina BJP, Mizoram pisaa political session-ah thu sawiin, "Mizoramah BJP kan sorkar chuan Mizorama mihring 75% loneitute leh kut hnathawktute tan hma kan la dawn. India ram state zinga thawh chhuah ngah ber, leiba nei tlem ber, BPL awm lohna state-ah kum nga chhungin Mizoram kan siam ang tih hi Pu Narendra Modi-a hoa kan thil tum a ni," a ti.

Mizoram BJP President chuan, Mizoramah BJP an sorkar chuan Mizorama mihring 75% loneitute leh kut hnathawktute tan hma an lak dawn thu a sawi a, "Farmer First Policy kalpuiin, kum nga chhungin loneitute leh kut hnathawktute sum lak luh a lêt a tihpun a nih theih nan central leh state aṭanga ṭanpuina awm thei zawng zawng hmangin chhawmdawl an ni ang," a ti a; Pradhan Mantri Kisan Samman Niddhi Scheme (PM-KISAN) hmanga loneitute'n kum tin Rs 6,000 an dawn ṭhin chu Rs 10,000-ah tihpun a nih tur thu a sawi.

MIZORAM BJP PRESIDENT SAWI DANGTE

▶ PM-KISAN dawngtute Kisan Credit Card (KCC) pek an ni ang a, KCC hmangin loneitute'n a pung awm loin loan Rs 5,00,000 thleng an la thei ang.

▶ PM-KISAN dawngtu zawng zawng kum 60 an tlin aṭangin pension thla tin Rs 3,000 an lak theihna siam a ni ang.

▶ PM-KISAN dawngtute'n dam lohna vanga harsatna an tawhin, free medical treatment Rs 5,00,000 thleng an dawn theihna turin PM Ayushman Bharat Scheme-ah ziah luh vek an ni ang.

▶ Loneitute'n an huan leh lo kalkawng all weather motorable road-in agriculture link road hnuaiah kum nga chhungin sial vek a ni ang.

▶ Loneitute'n an thlai thar India khawpui hrang hranga rang taka hralh tura an phurh thlen theih nan sorkarin ruahmanna a
siam ang.

▶ Loneitute tan kum tin leilet hectare 10,000 siam a ni ang.

▶ Loneih (agriculture) hmasawnna thlira sawiho turin special legislative assembly session neih ṭhin a ni ang.