Home Minister-in 2nd IR a tlawh

Home minister Lalchamliana chuan nimin khan Mizo Indian Reserved police 2nd battalion hmunpui, Khawzawl Lungvar Venga mi a tlawh a, 2nd IR hotute nen an inkâwm.

Lalchamliana chuan, police-te chu an hna rinawm taka thawk zel turin a fuih a; police indaih lohna hnawhkhah tumin sorkarin theihtawp a chhuah nia sawiin, hripui léng vangin duhthusamin post ruak hnawhkhah theih ni lo mah se, compassionate appointment-a police lak mi 290-in training an neih mek thu a sawi.

Home Minister chuan, indaih lo chung pawha police-te'n hna ṭha taka an thawk ṭhin chu fakawm a tih thu sawiin, "Aizawl Traffic Police leh Cyber Crime Police-te chuan state dangte khaikhin pawhin hna an thawk ṭha tak zet a ni," a ti.

2nd IR commandant Saidingliana chuan, an dinhmunte Home Minister a hrilh bakah, an mamawhte a thlen a ni.

2nd IR Battalion hi January 15, 2001 khan din a ni a, tuna an awmna Khawzawl Lungvar Vengah April 5, 2005 aṭangin an awm a, Commandant hoin mi 465 vel an awm mek a ni.