Saitualah Taxation pisa hawn a ni

Taxation minister Lalchamliana chuan nimin khan Saitualah Deputy Commissioner of State Tax pisa a hawng a; Mizoram sorkarin mipui tan nasa takin sum a séng tih a sawi.

Lalchamliana chuan, Taxation department chu Mizorama revenue tax chhûn luhna bulpui a nih thu a sawi a, "Mizoramah income tax kan pe ve lo a, sorkarin mipui mamawh tur phuhrûk nan pawisa tam tak a sèn a ngai. Retailer aṭanga buhfai lei turte leh electric bill-te chu sorkarin hmun dang aṭangin man sang zawkin a lei a, mipui tan tláwm zawkin a hralh leh a, sorkarin sum tam tak a séng ṭhin," a ti.

GST huam loh petroleum tax, VAT leh professional tax aṭangin Taxation department-in chhiah a la ṭhin tih sawiin Minister chuan, "Sorkar kum 2022-23 a chhiah hmuh cheng vbc. 1,020 chu a sàn ber ṭum ni mah se, Mizoram sorkarin sum a hman tur zawng zawng aṭanga teh chuan tê tak a la ni rih," a ti a, intodelh a pawimawh thu a sawi.

Taxation Minister chuan, Mizoram hmasawn zel nan sorkar leh mipuiin tih tur an nei tih sawiin, "Mipuite'n rinawm leh dik taka dan anga chhiah pek chu kan tihmâkmawh a ni," a ti a; Taxation department chu mipuite'n awlsam zawka chhiah an pek theihna tura din a nih thu leh department hlauhawm a nih loh thu a sawi bawk.