HC Judge-in Lunglei Court a tlawh

Gauhati High Court judge Justice Nelson Sailo, Lunglei Judicial District bialtu (portfolio judge) ni bawk chuan nimin khan Lunglei District Court a tlawh a, court building thar sak theihna tur hmunhma a enfiah.

Justice Nelson Sailo hian Lunglei DC leh SP a kâwm a; dan leh thupek kenkawhnaah thawhhona ṭha zawk a awm theih nan leh mipui zalenna leh dikna chanvo humhim a nih theihna tura thuneitute mawhphurhnate a sawipui.

BAR hruaitute leh member-te nen an inkawm-naah court hmun-hma ṭha zawk leh fuankim zawk neih a nih theih nan chak zawka hmalakna kalpui an duh thu an lo thlen a; Nelson Sailo chuan, chak zawka court thubuai tihfel a nih theih nan ṭan la turin judicial officer-te a chah bawk.

Justice Nelson Sailo hian court hmunhma siamṭhatna atana hna thawktu PWD Building Division hotute a theih anga chaka hmalak dan tur a sawipui bawk a; Lawngtlai leh Siaha district-a court leh quarters saknaa hmalak mek leh hmalak la ngaite an sawiho nghal.

Lunglei Judicial district hnuaiah hian Lunglei, Hnahthial, Saiha leh Lawngtlai district a awm a; Lunglei District Court-ah thubuai ngaihtuah mek 352 a awm a ni.