Handloom Export Facilitation Hub hawng

Commerce & Industries minister Dr R Lalthangliana chuan nimin khan Thenzawlah Mizoram Handloom Export Facilitation Hub leh thlai leh sa zawrhna bazar in thar a hawng a; Thenzawl khua chu puan tahna hmanraw hrang hranga thuam a nih dawn thu a sawi.

Dr R Lalthangliana chuan, "Puantahna hmunpui, puan an tah thiam êm avanga lâr Thenzawl khua hi hmanraw hrang hranga thuam a ni dawn. Khawvel zau zawk thlirin ram chhung chauh ni lo, ram páwn thlenga kan thil zawrhin hralh a tlâk theih nan kan thil siam chhuah reng reng quality ṭha, belhchian dâwl a ni tur a ni," a ti.

Mizoram Handloom Export Facilitation Hub hi Mizorama puantah leh design mawi tak takte hmanga ram danga thawn tur siam chhuahna hmunpui tura ruahman a ni a; textile testing laboratory leh design studio te, la dumna tur dyeing unit te, warping machine, bobbin winding machine, fly shuttle frame loom leh a dangte dah tum a ni.

Mizorama puantahte chu Indian Handloom Brand hnuaia inziah luh a, bar code pek tum a ni a; tualchhung puantahte chak zawka hralh a nih theih nan e-commerce platform hrang hrangah zawrh tum a ni bawk.

Thenzawl bazar atana in sak thar hi chhawng hniha sang niin, Mizoram sorkar sum nuai 150 sênga sak a ni a, mi 23 velin thlai an zawrh theihna tur siam a ni. Minister chuan, bazar thar chu loneitute tan sum lak luh theihna tur kawng hawngtu a nih a beisei thu a sawi.