Kolasib-ah Red Ribbon Quiz buatsaih

Mizoram State AIDS Control Society (MSACS) leh Kolasib District AIDS Prevention and Control Committee (DAPCC) chuan nimin khan Kolasib-a IPR Conference Hall-ah District Level Red Ribbon School Quiz Competition an buatsaih a, Kawnpui Higher Secondary School aiawhte pakhatna an ni.

Red Ribbon Quiz-ah hian Kolasib district-a sikul 10 an tel a, sikul aiawhin zirlai pahnih zel an tel. Kawnpui HSS aiawha tel R Lalhriatzela leh Robert Hmangaihzuala te pakhatna niin, lawmmanah Rs 5,000 an dawng a, pahnihna Kawnpui High School-in Rs 4,000 leh pathumna Chawnghmingliani Memorial High School-in Rs 3,000 an dawng.

Kolasib district-ah hian Red Ribbon School Quiz hi school level-ah buatsaih hmasak niin, district chhunga sikul 41 an tel a, a ti ṭha zual sikul 10 chu district level-ah an inel leh a ni. District-a pakhatnate hi state level Red Ribbon Quiz-ah Kolasib district aiawhin an tel ang. State level aṭangin regional level leh national level thlenga kal zel theih a ni.

Red Ribbon Quiz hi Kolasib bawrhsap John LT Sanga'n a hmanpui a, zirlaite chu an tumah chianga tih tak zetna nena lehkha zir tur te, hriselna ngai pawimawh tur te, ruih theih thil laka inthiar fihlim tur te, mahni inthunun turtein a chah.

Kolasib chief medical officer Dr RK Lalthlamuana sawi danin, June 2002 aṭanga July 2023 thleng khan Kolasib district-ah thisen endik 90,559 (mipa 36,494 leh hmeichhia 54,065) aṭangin HIV vei mi 1,787 hmuh chhuah a ni.