KHAWTHLIR

Kawlphetha hmu tha dawn lo

Power & Electricity department chuan vawiin hian Maumual line-ah hna an thawk dawn tih an tarlang a; hei vang hian chawhma dar 10 leh tlai dar 4 inkarah Maumual, Hunthar Veng, Edenthar Veng pumpui, Chanmari West, Chaltlang Lily Veng, Chaltlang Dingdi Veng, Bawngkawn Bazar, Bawngkawn Chhimveng leh Ramhlun PWD Tlang ten kawlphetha an hmu ṭha dawn lo.

Vawnthat dan zirho

Art & Culture department, The Heritage Consortium, Patna leh HDFC Bank-te chuan September 7, Ningani khan Mizoram State Archives Hall-ah record vawnṭhat dan zirhona, 'Workshop on Preventive & Curative Measures of Archival Records Along with the Latest Methods of its Storage' an buatsaih. Chief secretary Dr Renu Sharma-i'n a hmanpui a, sorkar department-te chu The Mizoram Public Records Act, 2011-in a phût angin an record-te enkawla vawng ṭha turin a chah. Zirhona hi nimin khan chhunzawma zawh a ni.

ZPM inkhawm

ZPM party chuan nimin khan an pisaah political session an nei a, Dr Jeffrey R Lalramdina'n thu sawiin, "ZPM hi chuan a sawia sawi ringawt hi kan ti lo, a tiha tih lam hi kan ti zawk ṭhin," a ti. Mizoram sorkar hnuaiah hna a awm hlei thei tawh lo a, a awm chhunte pawh tute emawin an inchuh zawhte a ni ṭhin tih sawiin, "Chuvangin, ZPM hi kan sorkartir ngei ngei a ngai a ni," a ti bawk.

Inthlan dan inzirtir

Deputy election commissioner Dharmendra Sharma, IIIDEM director general ni bawk chuan nimin khan Aijal Club-ah kumina MLA inthlanpui inbuatsaihna atana training hrang hrang pe tura thlan state level master trainer mi 18 leh district level master trainer mi 33-te a kâwm a, inthlan buatsaih dante zir uluk turin a chah. Master trainer-te hi training pe chhâwngtu tur an ni.