PMAY chhunzawm dan tur sawiho

Kolasib District Prandhan Mantri Awas Yojana (PMAY) Screening Committee chu nimin khan district bawrhsap Sangchhin Chinzah kaihhruaiin DC Conference Hall-ah an ṭhukhawm a; district chhunga MLA pahnih - Andrew H Thangliana (Tuirial) leh Lalrinsanga Ralte (Serlui) ten an telpui. PMAY - Housing for All kalpui chhunzawmna tura inbuatsaihnate leh hmalak dan tur sawiho a ni.

Ṭhutkhawmnaah hian PMAY-HFA kal­tlanga Kolasib, Kawnpui, Vairengte leh Bairabi khuaa in sak ṭanpuina hmu thei hming 1,791 chhawpte enfiah a ni a, dilna lut zinga 137 hnâwl an nih chhante an endik. Kolasib district-a PMAY kalpui mekah a nih dan tur anga hma la lote bawhzui dan tur te, ṭanpuina tihtawpsak leh an hmuh tawh lâk lêtsak thlenga bawhzui ngai a awm thu an sawi.

Kolasib district-ah ṭanpuina hmu ve thei lo an awm thu tarlan niin, chu'ngte chu a bik takin Aadhaar card siamtir duh lo an nih thu tarlan a ni a; District Urban Deve­lopment Office (DUDO) leh bank hrang hranga hotute awlsam zawka an indawr tawn dan an sawiho bawk.

Meeting-a tarlan danin, December 2019 thleng khan Kolasib khaw chhungah PMAY hnuaiah in sa mi 311 an awm a, chu'ng zinga mi 135 chuan 3rd instalment thlengin an hmu tawh. Kawnpuiah chuan mi 147 zingah 3rd instalment  hmu tawh mi 43 an awm. PMAY Housing for All (Urban) hi 2015 aṭanga 2022 chhunga kalpui tura ruahman a ni a, Mizoramah chuan bene­ficiary-led construction scheme (BLC) leh credit linked subsidy scheme (CLSS) kalpui mek a ni. BLC hnuaiah in sak ṭanpuina Rs. 1,50,000 ruahman a ni.