Party-te'n candidate tur an tifel thawkhat tawh: ZPM-in 39, MNF-in 38 leh INC-in 36 tifel

Kumina MLA inthlanpui awm turah political party lian deuhte'n an candidate turte an tifel thawkhat tawh. Zoram Peoples Movement (ZPM)-in candidate tur 39 an puang tawh a, Mizo National Front (MNF) leh Indian National Congress (INC) ten candidate turte la puang vek lo mah se, an tifel kim ṭêp tawh.

MNF Nomination Committee chu Septem_ber 9, Inrinni khan an chairman Zoram­thanga, MNF president hoin an ṭhukhawm a, MLA bial 38-a an candidate tur an tifel. Nomination Committee aṭanga Vanglaini thu dawn danin, candidate tur an la tihfel lohna bialte chu - Assembly speaker Lalrinliana Sailo bial Chalfilh leh Aizawl South-II a ni.

MNF MLA ni laite chu an ding leh deuh vek dawn a, Robert Romawia Royte leh R Lalzirliana te chu kum 2018-a an tlinna bial chhuahsanin bial dangah an insawn a; Home minister Lalchamliana chu kuminah a ding tawh dawn lo a, a bial - Hrangturzo-ah MNYF vice president hlui Lalremruata Chhangte a ding dawn. Lalrinliana Sailo chu MNF ticket-in a bial ngai Chalfilhah a din dawn leh dawn loh hriat a ni lo.

MPCC president Lalsawta hnen aṭanga Vanglaini thu dawn danin, Congress party chuan bial 36-a an candidate turte an tifel tawh a, an la tihfel loh bial palite pawh an tihfel theih thuai an beisei.

Lalsawta chuan, candidate tur an neih ṭhat thu sawiin, "Sorkar tum kan ni a, sorkar turin kan bei. Theihtawp kan chhuah a, kan sorkar ngei pawh kan ring," a ti.

ZPM party chuan bial 39-a an candidate turte July 18, 2023 khan an puang tawh a, Tuichawng biala an candidate tur erawh tun thlengin an la puang lo.

Vanglaini palai zawhna chhángin ZPM leader Lalduhoma chuan, Tuichawng biala an candidate turah headquarters an inrawlh loh thu a sawi a, "Anmahni inruat a, headquarters-a rawn thlen turin kan ti. Candidate inchuh an awm avangin an la tifel thei lo," a ti.

Tuichawng biala tlin an inrin leh inrin loh zawhna chhangin Lalduhoma chuan, "Candidate inchuh tham an awm a nih chuan tlin an inbeisei tihna a ni mai. Kan va inrawlh lo a, anmahni an inchingfel thei turah kan ngai," a ti a, tlin theihna chance an nei niin a sawi.