Mizoram electoral roll-a Bru la awmte paih tawh lo turin Bru-te'n ECI ngen

Mizoram aṭanga Tripura-a pém Bru pawl hruaitute chuan, an mi leh sa zinga Tripura electoral roll-a la thun ve loh, Mizoram electoral roll-a la chuangte chu Mizorama vote neihtir zel an duh thu Election Commission of India (ECI)-ah an thlen a, paih tawh lo turin an ngen.

Mizoram Bru Displaced People's Forum (MBDPF) chuan tun hnai khan ECI hnenah lehkha an thawn a; Tripura-a inbéngbel tawh ni mah se, Tripura electoral roll-a la thun loh an awm tih tarlangin, chu'ng mite chu Mizoram electoral roll aṭanga paih loa la awmtir rih turin an ngen a, "Vote thlak hi India khua leh tui zawng zawng chanvo a nih avangin khawi electoral roll berah emaw an awm hi an chanvo a ni," an ti.

MBDPF tarlan danin, Mizoram aṭanga Tripura-a pém Bru zingah Tripura electoral roll-a la thun loh mi 3,500 vel an awm a ni.

Hetih lai hian, MBDPF ngenna chungchangah Mizoram sorkara Elec­tion department chuan ECI aṭangin thu dawn an la nei lo.

Mizoram aṭanga Tripura-a inbéngbel tawh Bru mi 11,997 chu Mizoram electoral roll aṭanga paih niin, Tripura electoral roll-ah thun luh an ni tawh a ni.