Political Awareness Campaign buatsaih

Mizoram People Forum (MPF), Aizawl West-I Constituency Forum chuan September 9, Inrinni khan nilengin Luangmual Presbyterian Kohhran Centenary Hall-ah Political Awareness Campaign an buatsaih.

MPF Political Awareness Campaign hi chawhma lamah Constituency Forum president Rev. H Lalmuanchhana'n a kaihruai a, resource person Rev. Lal­ramliana Pachuau, MPF general secretary-in MPF leh political party hrang hrangte Thawhhona Thuthlung chungchang a sawifiah.

Chawhnu hun chu Constituency Forum senior vice president Upa RL Ṭhianga'n a kaihruai a, resource person-in inthlanna dik, fel leh thianghlim leh sorkar ṭha neihna tura pawimawhte a sawi leh a ni.

MPF Aizawl West-I Constituency Forum chhungah hian local forum 15 a awm a; Inrinnia Political Awareness Campaign-ah hian MPF local forum aiawh pahnih ṭheuh leh political party hrang hranga unit tin hruaitu pahnih ṭheuh tel tura sàwm niin, mi 120 vel an tel a ni.