Tualthah thubuai avangin ruang phawrh a ni dawn

August 21, 2023 zan dar 11 vela Sailomawia (72), BSUP Lawipu thihna thubuai kaihhnawihah vawiin hian Sailomawia ruang phawrh a ni dawn.

Police aṭanga Vanglaini thu dawn danin, Sailomawia hi a fanu Lalrengpuii nen BSUP, Lawipu-ah an chêng dun a, August 21, 2023 zan dar 11 velah a thi a, rinhlelhna a awm loh avangin a tûk August 22-ah vui a ni.

Sailomawia te tlawh fotu a tupa Benjamina leh Lalrengpuii te tun hnaiah an inhau a, Sailomawia thihna chungchang sawi chhuah a ni a; Sailomawia thihnaah inhnamhnawia ngaih an nih avangin an pahnihin September 4 zan khan police-in an man.

Police-te hmaa an sawi dan chuan, Lalrengpuii hian a pain a hauh fo avangin that mai tura a tih angin Benjamina hian Sailomawia chu a muthilh laiin a that a ni.

Police-te chuan report (FIR) an dawn bawhzuiin Sailomawia thihna chu an chhui zui a, magistrate aṭanga phalna an hmuh hnuah vawiin hian a ruang phawrh a ni dawn a, a hmunah endik (postmortem) a ni ang.