Manipur-a Mizote tan ṭanpuina pe

Manipur buaina vanga sahimna zawnga tlanchhia Mizote chhawmdawlna atan Central YMA hnenah Hrangkhawl Welfare Society, Zion, Halflong-te chuan Rs 2,10,000 an pe a, Tripura-a Central Young Kaipeng Association (CYKA) leh Mizoram Kaipeng Welfare-te chuan Central YMA hnenah Rs 1,00,000 an hlân bawk.

Haflong, Assam-a awm Hrangkhol Welfare Society chuan September 8, 2023 khan Manipur ráltlânte chhawmdawlna atan CYMA hnenah Rs 2,10,000 an hlân a; ṭanpuina inhlanna hi CYMA pisaah neih niin, CYMA hruaitute'n an lo dawng a ni.

CYKA leh Mizoram Kai­peng Welfare-te pawhin Manipur rál­tlânte chhawm­dawlna atan CYMA hnenah Rs 1,00,000 an thawh a, CYMA aiawhin general sec­retary Lalnuntluanga leh treasurer Fabian Lal­fakawma ten an lo dawng.

Kaipéng hnam hruai­tute chuan, Manipur-a Zo fate tawrhna chu pawi an tih thu sawiin, "Kan theih ang tâwka ṭanpui zel kan tum. Kan unaute chunga Manipur sorkar hmalak danah kan lungawi lo hle a, rorelna dik an pek ngei theih nan Tripura lamah pawh kan theih angin hma kan lo la zel ang," an ti.

CYMA general secretary Lalnuntluanga chuam, Tripura-a Kaipeng hnamte leh Assam-a Hrangkhawl hnamte'n Manipur-a Mizote chhawm­dawlna tur an thawh chuan unau an nihna leh thisena inzawm an nihna a entir tih a sawi a, "Zo hnam inpumkhatna a thlen ngei ka ring tlat. Zo fate hi koh dan hrang hranga koh kan ni a, Kuki tih te, Chin tih te, Mizo tih te, Zo tihtea koh kan ni," tiin, hnam dangin an sawi dan dang mah se, unau vek an nih thu a sawi.