KHAWTHLIR

KTP-in thisen pe

KṬP, Aibawk Pastor Bial chuan September 9, Inrinni khan thisen pêk rûnpui an huaihawt a, Zoram Medical College tan thisen unit 45 an pe a, petute mipa 37 leh hmeichhia pariat an ni.

Chhawmdâwlna hlân

MZP leh Zo Event Management-te chuan September 9, Inrinni khan Manipur buaina avanga tlânchhia, Kolasib district-a Phainuam khuaa awmte hnenah chhawmdawlna an hlân. Phainuamah hian Manipur ráltlân mi 350 awmin, Phainuam khawtlangin an enkawl a; MZP leh Zo Event Management hian Manipur ráltlânte ṭanpuina tura charity concert an buatsaih aṭanga an hmuh aṭangin chhawmdawlna tur buhfai ip 25 leh Rs 5,000 an hlàn a ni.

Kawng thar hawng

Aizawl South-I bialtu MLA C Lalsawivunga'n a MLA fund hmanga Bethlehem Vengthlanga kawng a siam chu September 9, 2023 khan AMC-a bialtu councillor R Lalawmpuii, ZPM Zonu president-in a hawng. Kawng hawn tâk hi Bethlehem Vengthlang Chuanhnuai Welfare huam chhunga mi niin, metre 70-a thui, cement concrete (RCC)-a siam a ni a, Rs 6,20,000 sénga siam a ni.

Minister-in hmanpui

YMA, Sub-Headquarters, Lunglei-in Golden Jubilee an lawmna puala Inter Branch YMA Badminton Tournament an buatsaih chu September 9, Inrinni khan khâr a ni a, khârna inkhawm hi minister C Lalrinsanga'n a hmanpui. Inelnaah hian mipaah Luangmual Branch leh hmeichhiaah Rahsi Veng an champion a; branch champion chu Lungmual Branch an ni.

Street campaign

ZPM party chuan September 9, Inrinni zing khan Bawngkawnah street campaign an buatsaih a, AMC Ward-III councillor C Lalchhandami'n thu sawiin, "ZPM MLA candidate-te chu eirûknaa fihlim turin an intiam vek a, he ram siamṭhaa hma lam pan turin an ngaihtuahna zawng zawng an séng a, chief minister ṭha hnuaiah ram siam tak tak turin an rintlak ngei dawn a ni," a ti.

Lirthei chesualah thi

H Lalchhanchhuahi (27), New Capital Complex chu September 8, 2023 tlai khan Lungleiah auto rickshaw-a chetsualna avangin a thi. H Lalchhanchhuahi hi damdawi-in panpui a nih hnuah a thi a, Lungleiah lumen niin, September 9, 2023 tlai khan Aizawla an chenna in thlenpui a nih hnuah an vui a ni.

Ṭanpuina sem

Hnahthial district fishery development officer George Lalnuntluanga chuan September 8, 2023 khan Hnahthial Horeb conference hall-ah Pradhan Mantri Matsya Sampada Yojana (PMMSY) hnuaia sangha dil siam ṭanpuina dawng tur mi 50 hnenah Rs 45,360 ṭheuh a hlan. Ṭanpuina dawngtute chu sum an dawn ní aṭanga hma la nghal tura beisei an ni a, sangha dil square metre 100 laih tur a ni.