College zirtirtu indaih lohna a theih anga hnawhkhah tum a ni - HTE Minister

Mizo Students’ Union (MSU)-in Thenzawla General Conference vawi 21-na an hman chu September 8, 2023 zan khan a ṭiak a; a tàwp zanah hian Higher & Technical Education (HTE) minister Dr R Lalthangliana'n hmanpuiin, college zirtirtu leh thawktu dang indaih lohna a theih anga hnawhkhah tum a nih thu a sawi.

HTE Minister chuan, college hrang hrangah zirtirtu leh thawktu indaih lohna a awm thu sawiin, "Ramin sum harsatna a tawh avangin duh anga hnawhkhah mai theih ni lo mah se, a theih ang anga hnawhkhah tum a ni. Covid léng avangin Mizoram sorkarin harsatna a tâwk nasa a, hri léng piah lamah ram dangin an tawh ve loh harsatna tam tak Mizoramin nasa takin a tuar a ni," a ti a; Mizoram sorkarin a tum ang leh ruahman angin hma a la thei lo niin a sawi.

Mizo tlawmngaihna chu sawifiah thiam a har thu sawiin R Lalthangliana chuan, "Pi pu chena kan ro hlu heng tlawmngaihna, aia upa zahna leh rinawmnate chhawm nung zelin, Pathianin kan thinlunga a dah ngheh tlat hmangaihna leh lainatnate i vawng nung zel ang u," a ti.

Dr R Lalthangliana chuan, Mizo zinga mi ropui kal tate sûlhnu ngaihhlut thiam a ṭul thu a sawi a, "Khawvel thiamna sang tawh takah hian thiamna tak tak kan neih loh chuan kan ramah hna thawk turin hnam dang an rawn lut zel ang a, min chîmralna kawng a la ni thei dawn," tiin, thiamna tak tak nei lo tan hna hmuh a harsat telh telh dawn thu a sawi.

Khualzahawm Dr L Thangmawia, MLA pawhin thu sawiin, Pathianin Mizo zirlaite thinlungah hnam hmangaihna a dah tlat chu ropui a nih thu a sawi a, "Kan ram hruaitute hian eng nge an tih ṭhin tihte hi zir chian nachang hria ang che u," a ti.

MSU General Conference inkhawm hnuhnung ber hi MSU assistant general secretary Samuel Lalruatdika'n a kaihruai a; MSU president Samuel Zoramthanpuia pawhin thu a sawi a ni.