Kan innghahna chu Pathian a ni - Lalsawta

Mizoram Pradesh Congress Committee (MPCC) president Lalsawta chuan, Mizoram inthlanpui awm turah party ṭhenkhat chu an sum ngaha innghatah leh BJP sum hmanga sorkar tumah a puh a, Congress party chu Pathianah an innghat niin a sawi thung.

Lalsawta hian September 8, 2023 zan khan Hyve Studio, Aizawlah an party zawm thar lawm luhna inkhawmah thu sawiin, "Inthlan hmachhawn turin party ṭhenkhat chuan sum ngahte hi hmanraw tlingah an ngai a, an innghat a. Party dang chuan BJP chakna leh pawisa hmanga sorkar an tum. Keini chuan hetiang hi kan nei lo a, kan thei lo, a tum pawh kan tum lo. Kan innghahna chu Pathian a ni a, a lam kan hawi mai a ni," a ti.

Pathian hnenah an mamawh leh an duhte an thlen tih sawiin Lalsawta chuan, "A duh zawng tih tuma rilru dik púa theihtawpa kan campaign chuan Pathianin kan lakah a beng a chhí ang a, mal min sawm ngei ang tih hi kan innghahna a ni," a ti a; Hindu lal ram din tumtute lakah Mizo ram, hnam leh sakhua a him theih nan ṭangrual turin Mizoram mipui a sáwm.

MPCC president chuan, India ramah Kristian 2% vel an awm nia sawiin, "Missionary kan tirh chhuah zawng zawngte pawhin sakhaw zalenna an neih a, miin an lo hriatthiam a, an lo tihduhdah lohna tur te, mihringte tana Isua chanchin ṭha kawng hrang hrang hranga an thehdarh ṭheuhna tura zalenna chu tunah chuan kan lo rálṭi ta a, a pawi tak zet a ni," a ti bawk.

Lalsawta hian Congress party-ah Serampore College principal Dr Vansanglura a lawm lut a; Vansanglura chuan, Congress party a zawm chhan chu Isua chanchin ṭha la hre lote hnena nasa zawka hril a nih theihna tura kawng sialnaa a ngaih vang a nih thu a sawi a; Serampore College-a thawkte chu politics tel phalsak an nih thu a sawi a ni.