Sorkar hna lâka sipai bángte tana Seat hauh thu court-a thlen an rél

Mizoram Ex-Services League chuan September 9, Inrinni khan Vanapa Hall-ah General Assembly vawi 34-na an hmang a, Home minister Lalchamliana'n a hmanpui. Sipai bángte pawl hian Mizoram sorkar hnalaknaa sipai bángte tana hmun hauh chungchang chu High Court-ah thlen an rél.

Home Minister chuan, Mizoram sorkarin sipai bángte a duhsak thu sawiin, "Police lak turah ex-service-te tan seat 5% hauhsak a ni. Mizoram Home Guard aṭanga Police-a lut turte tan sorkarin ngaihtuahna thui tak a sên tawh laiin, Covid hripuiin harsatna a siam a, sorkar chuan tihlawhtling turin hmalakna a kalpui mek a ni," a ti.

Lalchamliana chuan sipai bángte chu ram tana mi ṭangkai ni zui zel turin duhsakna a hlan a, "Sipaia ṭan hi mahni, chhungkua leh khawtlang tan thil ṭha a ni a, ram leh hnam humhimtu an nihna piah lamah, chhungkaw châwmtu leh khawtlang tan mi ṭangkai an ni," a ti a; Mizo zinga IAS leh sorkar hna lian dang thawk zingah sipai fa an tam thu a sawi.

Inkhawm hi MESL senior vice president Lt.Col. ZS Zuala'n a kaihruai a; MESL president Lt.Col. Clement Lalhmingthanga leh Sainik Welfare and Resettlement director Surg.Lt.Cdr. Lalnuntluanga te pawhin thu an sawi a ni.

Chawhnuah MESL President kaihhruaiin ro an rél a; an rorel zingah, 'Mizoram sorkar hna laknaa ex-servicemen te reservation chungchang chu High Court-ah petition thehluta kalpui ni se,' tih a tel a ni.