August thlaah hmun 156-ah leimin

Mizoram hmun hrang hrangah kumin August thla chhung khan ruahsur nasa vangin hmun 156-ah leimin a awm a, lungrem chim leh tuilian vanga harsatna thleng eng emaw zat a awm bawk.

DMR department aṭanga thu dawn danin, district hrang hranga District Disaster Management Authority (DDMA)-te aṭanga report an dawn danin, kumin August thla chhung khan ruahsur nasa vangin Mizoram hmun hrang hrangah 156 velah leimin a awm a, Lunglei district-ah tam berin hmun 56-ah a awm a ni.

Leimin bakah hian hmun hrang hrangah lungrem chim, thing tlu, tuilian, chenna in chhia leh in chhuahsan te, huan thlai chhia te, kawng ping, lei tlahniam leh khi, quarry chim leh lung tlate a awm bawk. Chhiatna thlenna hmun hrang hrangah hian DDMA kaltlangin ṭanpuina leh chhawmdawlna pek a ni.

Kumin September thlaah pawh DMR-in report an dawn chinah Aizawl, Lunglei leh Champhai district chhunga hmun paliah ruahsur nasa vangin leimin a awm tawh bawk.