Hnahlan Police Beat Post hawn a ni

Champhai North bialtu MLA Dr ZR Thiamsanga chuan September 9, Inrinni khan a bial chhunga Hnahlan khuaah Police beat post thar a hawng a; beat post chu police station puitling ni tura hmalak a tum thu leh MLA fund hmanga thuam ṭhat zel a tum thu a sawi.

Hnahlan Police Beat Post thar hi Hnahlan Tlangnuam Vengah ruahman a ni a, bul ṭan nan head constable hoin police paruk an awm dawn. Hnahlan bakah, Khuangphah, Vaikhawtlang, Vapàr, North Diltlang, Mûrlèn, Tualchéng, Lungphunlian leh Selàm khuate a huam ang.

Passport/permit tel loa India leh Myanmar mite inkalpawh tawn theihna, free movement regime hnuaiah Hnahlan hi Myanmar leh India khua leh tuite luh leh chhuahna hmun (entry & exit point) tura sorkarin a ruat a ni.

Dr ZR Thiamsanga chuan, Hnahlan Police Beat Post thar chu Hnahlan leh a chhehvel khuate himna leh hmasawn zelna atana pawimawh a nih thu a sawi a, "Kawng hrang hranga hmasawnna kan neih theih nan kan khawtlangah himna leh muanna a awm hmasak a ṭul," tiin, an mawhphurna ṭha taka hlen a, mipui tana innghahna ngam ni turin Beat Post-a thawktu police-te a chah.

Champhai bawrhsap James Lalrinchhana pawhin thu sawiin, Hnahlanah Police Beat Post thar siam a ni ta chu Champhai district tan rahbi thar a nih thu a sawi a; dan leh thupek kenkawh kawngah theihtawp chhuah tlâng turin police-te leh khawtlang mipui a chah a ni.