Suangpuilawnah fai leh plastic hman tlem zirtir

PHE department chuan Swachh Bharat Mission (Gramin) hnuai­ah nimin khan Suangpuilawn khuaa sikul hrang hrangah faina chungchanga inzirtirna leh plastic hman tlem inzirtirna an buatsaih.

Faina chungchang inzirtirnaah hian PHE-in SBM(G)-a ambassador atana an hman mek Laltharzeli, national awardee-in zirlai naupangte chu faina pawimawhzia leh faina kawnga hmalak dan turte a hrilh a; zirlaite chu Suangpuilawn V/C-te leh khawtlang hruaitu dangte'n an ṭawiawm a ni.

Laltharzeli chuan, Suangpuilawn chu faina leh thianghlimna kawnga khaw entawn tlak, thingtlang khaw fai ber pawh lo ni tawh ṭhin a nih thu sawiin, faina lama ṭan la zel turin a fuih a, "Sor­kar hmachhawp - plastic hman tlem leh ram leilung tichhe thei lakah kan ram hi kan venhim a ngai a, chutianga hmalakna kawngah khaw fai tawhte an pawimawh hle. Tuna naupang tê tête hi nakina kan khawvel turte an nih avangin tun aṭanga faina an nunpui chuan kan fai zel dawn a ni," a ti a; faina kawngah naupangte an harh tih sawiin, chu chu puitlingte'n an tuipui ve a ṭul thu a sawi.

Inzirtirna hi Suangpuilawn P/S, M/S, H/S leh Presbyterian English School-ahte neih a ni a; naupangte chu plastic lam chi reng reng hmang tlem tura intiamna thu sawi rualpui an ni.