Kumin kum tawpa inthlang turin Election department an inbuatsaih

Mizoram Election depart­ment chu kumin kum tawpa MLA inthlanpui nei turin an inbuatsaih mek zel. BJP kaihhruai sorkar laipuiin Lok Sabha leh state hrang hrangte a ruala inthlan (one nation, one election) a nih theihna tura hma an lak mek chungchangah Election department chuan thu dawn an nei lo.

Election department hotute hnen aṭanga Vanglaini thu dawn danin, Election Commission of India (ECI) kalphung angin Mizoram MLA inthlan hnuhnung ber kum 2018-a inthlan hun November 28-a inthlang tur angin an inbuatsaih mek. November 28 hi inthlan leh hun tur tihna ni loin, inthlan hun puan a nih hma chuan ECI chuan inthlan hnuhnung ber huna inthlang tur anga inbuatsaih phawt turin state-te a ti ṭhin a ni.

Kum tàwp lama inthlang turin ngawrh taka an inbuatsaih mek thu sawiin Election hotute chuan, "Ruahmanna hrang hrang ECI norms angin kan kalpui zel. Inthlang tura inbuatsaihna kawngah harsatna em em kan nei lo. Ṭha taka inthlanna kalpui turin kan inbuatsaih mek," an ti.

Tun hnaia chief election commissioner Rajiv Kumar hoa ECI team-in inthlang tura Mizoram inbuatsaih dan an rawn endik chungchanga zawhna chhangin Election hotute chuan, "Rawn sawisel lian tham an nei lo. Eng emaw tê tham deuh internal thilah erawh sawisel deuhte chu an nei," an ti a; inthlan hun puan hun turah thu an la rawn neih loh thu an sawi.

Election department hotute chuan, kumin MLA inthlan turah state páwnah polling station buatsaih a ngaih tawh dawn loh thu sawiin, "Tun hma kha chuan Mizoram electoral roll-a chuang Bru mi ṭhenkhatte kha Tripura-a camp-a awm an ni a, chuvangin, camp-ah vote an thlak theihna tur buatsaih a ngai ṭhin. Tunah chuan camp-a awmte hi Mizoram electoral roll aṭangin paih (delete) vek an ni tawh," an ti.

Election hotute chuan, Bru-te chu ECI aṭanga thu an hmuh dan ang zela paih an nih thu sawiin, "Tun ṭuma an rawn zin pawh khan Bru-te electoral roll aṭanga delete an nih chungchangah sawisel an nei lo," an ti a; hun kal zelah pawh sawisel an neih an rin loh thu leh sawiselna a awm pawha sawifiah tura an inrua­hman vek thu an sawi bawk.